Deputetja e Partisë Demokratike të Kosovës (PDK), Vlora Çitaku, ka reaguar me tone të ashpra ndaj qeverisë në lidhje me krizën energjetike që po godet ekonominë e vendit, veçanërisht sektorin prodhues, dhe që rrezikon mbi 140 mijë vende pune.
Përmes një postimi në rrjetet sociale, Çitaku ka ngritur shqetësimin për mosveprimin institucional, ndërsa ka rikthyer në vëmendje çështjen e ambasadorit Martin Berishaj, i cili, sipas saj, vazhdon të mbajë pozitën zyrtare pavarësisht përfshirjes në afera të dyshuara financiare.
“Bizneset prodhuese janë në prag të falimentimit për shkak të rritjes enorme të çmimit të energjisë elektrike. Ndërkohë, Martin Berishaj, përkundër akuzave dhe dëshmive publike për afera milionëshe, vazhdon të jetë ambasador,” ka shkruar ajo.
Çitaku ironizoi situatën duke thënë: “Një ditë në Prokurori, një ditë në Ambasadë. Marrëzia nuk paska kufi.”
Sipas saj, kjo situatë dëshmon për një mungesë të theksuar të përgjegjësisë politike dhe për një qasje selektive ndaj drejtësisë.
