Kryeministri i Kosovës, Albin Kurti sot përmes llogarisë së tij në Facebook ka paraqitur shtatë pikat e Qeverisë së tij për bashkësinë ndërkombëtare në mënyrë që të arrihet normalizim i marrëdhënieve me Serbinë.
E nënkryetarja e Partisë Demokratike të Kosovës, Vlora Çitaku i ka cilësuar si joserioze këto pika, derisa ka thënë se në fakt vet kryeministri Kurti është joserioz.
“Kryeministri Kurti i paska postu edhe nja 7 pika të reja: janë joserioze!
Në fakt, ai vet është joserioz. Një palaço jo-qesharak. Qe një kronologji:
- Për 6-7 vjet, Albin Kurti ka përdorur dhunë kundër çfarëdo marrëveshje të ndihmuar nga aleatët, duke mos kursyer asgjë dhe askënd: Është derdhur edhe gjak nëpër rrugë, janë hedhur bomba, gaz lotsjellës dhe është thirrur në luftë vëllavrasëse.
- Pas ardhjes në pushtet, tash Albin Kurti thotë që nuk e ka prioritet dialogun, dhe zbulon formula të ndryshme, përfshi “pesë kushte”, “tre principe”, “gjashtë pika” dhe zbulime të tjera të cilat janë harruar ca ditë më pas, ngase askush s’i ka marrë seriozisht – madje as ai.
- Për dy vjet aleatët perëndimorë dhe qytetarët e presin Kryeministrin Kurti të marrë vendim dhe t’i jap drejtim dialogut, i cili ka pasur synim njohjen e ndërsjellë. E vonon procesin dhe krijon drama të përditshme, duke reduktuar dialogun në çështje teknike.
- Pasi që përlahet me Lajçak, Borrell dhe gjysmën tjetër të botës, e si pasojë Kosovës i sjell edhe sanksione ndërkombëtare të cilat ende janë në fuqi, në një aksham pazar, pa kurrfarë koordinimi dhe me një paturpësi të pashoq, e pranon një statut të draftuar nga vetë Lajçak, të cilin e quante pro-serb, për autonomi pa njohje të ndërsjellë.
- Tash, pasi që i ka parë rezultatet shkatërruese të politikës së tij të jashtme dhe udhëheqjes amatoreske të dialogut, Kryeministri qohet dhe propozon 7 pika dhe kthehet pikërisht aty ku kemi qenë para 3 vitesh, duke thënë se vetë do ta draftojë statutin”, ka shkruar Çitaku.
Madje sipas saj, tashmë kryeministri Kurti është edhe i vonshëm dhe se askush nuk po e merr më seriozisht.
Tutje Çitaku i ka kërkuar kryeministrit që të fokusohet në vendimet e tij dhe të mos mirret me pastime pasi sipas saj, Facebook-u nuk është mjet adekuat për “face-saving”.
“Kryeministër, je edhe vonë edhe i vonshëm. Askush nuk po të merr seriozisht. Të gjithë, e më së shumti aleatët ndërkombëtarë, i injorojnë fjalimet dhe pikat e tuaja të shumta që propozon tash e sa vjet. Kosova ende vuan nën sanskione bashkë me Rusinë dhe Bjellorusinë. Fokusohu, merr vendime, e mos u merr me fjalime dhe postime. Facebooku nuk është mjet adekuat për “face-saving””, tha ai.
Ndryshe edhe kryetari i Lidhjes Demokratike të Kosovës, Lumir Abdixhiku, ka thënë se kryeministri i vendit, Albin Kurti, është vonuar dy vjet që të kuptoj se duhet ta hartoj draft-statutin e Asociacionit.
Abdixhiku ka shkruar se një gjë të tillë ia kishte thënë kryeministrit dy vite më parë, derisa ka thënë se tashmë është vonë për ta bërë një gjë të tillë./teve1.info./
