Nënkryetarja e PDK-së, Vlora Çitaku ka kritikuar Qeverinë lidhur me mënyrën se si po shqyrtohen projektligjet në komisionet e Kuvendit.
Përmes një reagimi, Çitaku ka thënë se sot po përshpejtohet shqyrtimi i një numri të madh projektligjesh të Qeverisë, përfshirë edhe disa që lidhen me sektorin e drejtësisë.
Sipas saj, këto projektligje po shqyrtohen “pa analizën e duhur, pa debat substancial dhe pa dëgjime publike”.
“Drejtësia nuk reformohet duke shmangur shqyrtimin parlamentar. Ky nxitim ngre dyshime serioze se ligjet po i përshtaten agjendës politike të pushtetit”, ka shkruar Çitaku.
Ajo ka ngritur kritika edhe për projektligjin për ndryshimin e Ligjit për Dhomat e Specializuara të Kosovës, duke pretenduar se ai po mbahet ende në Ministri, nën arsyetimin e “ekspertizës juridike”.
“Për ligjet e tjera, procedura të përshpejtuara. Për mbrojtjen e UÇK-së, zvarritje!”, ka deklaruar Çitaku.
Ajo u ka bërë thirrje ministres Donika Gërvalla, kryeministrit Albin Kurti dhe zyrtarëve përgjegjës që, siç tha, të mos e pengojnë procedimin e këtij projektligji.
“Procedojeni menjëherë në Kuvend. Dëgjojeni popullin që tash e 15 ditë është në shesh”, ka shkruar ajo.
Çitaku ka paralajmëruar gjithashtu se, sipas saj, çdo ditë vonesë do ta rëndojë përgjegjësinë e zyrtarëve përgjegjës, duke përfunduar me paralajmërimin: “Dita e llogaridhënies do të vijë”.
PDK-ja ka kërkuar ditëve të fundit që projektligji për ndryshimin dhe plotësimin e Ligjit për Dhomat e Specializuara të procedohet sa më shpejt për votim në Kuvend. Nisma e PDK-së është dërguar në Qeveri për shqyrtim./teve1.info/
