Deputetja e Partisë Demokratike të Kosovës (PDK), Vlora Çitaku, ka reaguar ndaj deklaratave të kryeministrit në detyrë, Albin Kurti, të bëra në emisionin “Këndi i Debatit” në Televizionin Tëvë1, ku ky i fundit komentoi lidhjet e zyrtarëve të PDK-së me ish-krerët e Ushtrisë Çlirimtare të Kosovës që ndodhen në Hagë.
Në reagimin e saj, Çitaku e akuzoi Kurtin se “me vetëdije të plotë ka vendosur t’i shërbejë Prokurorisë në Hagë”, duke aluduar në komentet e tij për vizitat e përfaqësuesve të PDK-së te ish-presidenti Hashim Thaçi dhe ish-kryeparlamentari Kadri Veseli.
“Albin Kurti, me vetëdije të plotë, ka vendosur sërish t’i shërbejë Prokurorisë në Hagë, kësaj radhe duke sulmuar Hashim Thaçin dhe Kadri Veselin. Madje, ka pasur guximin të thotë se ne i vizitojmë për të marrë ‘instruksione’”, deklaroi Çitaku.
Ajo e cilësoi këtë si pjesë të një fushate të qëllimshme të Kurtit për “përbaltjen e të tjerëve, sidomos të atyre që kanë kontribuar për lirinë dhe shtetin e Kosovës”, duke e quajtur atë lider autoritar që nuk pranon debat brenda partisë së tij.
“Në Vetëvendosje nuk ka as debat, as mendim ndryshe – vetëm një zë: tëndin. Në PDK është ndryshe. Ka diskutim. Ka mendim kritik. Ka demokraci. E kuptoj që kjo mendësi është e huaj për ty”, theksoi Çitaku.
Në fund të reagimit, ajo theksoi se lidershipi në PDK është i qartë dhe i legjitimuar përmes votës së brendshme, duke mbështetur kryetarin aktual Memli Krasniqi.
“Kryetar e kemi Memli Krasniqin. Një lider që ka legjitimitet, respekt dhe besim, brenda dhe jashtë partisë. Ndërkohë, ti vazhdo qaj e vajto. Se për rezultate nuk ke çka flet, sepse nuk ke asnjë”, përfundoi ajo.
Reagimi i Çitakut është pjesë e përplasjeve politike të intensifikuara në kohën kur vendi po përballet me një bllokadë për konstituimin e Kuvendit dhe formimin e institucioneve të reja.
Kurti: PDK është parti me 4-5 kryetarë, nuk ka ofertë për koalicion
