Nënkryetarja e Partisë Demokratike të Kosovës, Vlora Çitaku, thotë se në mungesë të shkarkimit, dorëheqja do të duhej të ishte e vetmja gjë për të cilën flet ministrja e Industrisë, Ndërmarrësisë dhe Tregtisë, Rozeta Hajdari.
Çitaku, thotë se Hajdari, sikur ambasadori i Kosovës në Kroaci, Martin Berishaj, kryeshefi i pezulluar i KEK-ut, Nagip Krasniqi, vazhdojnë të mbesin “kompasi moral, profesional dhe institucional i kësaj Qeverie të zhveshur nga llogaridhënia dhe interesat e shtetit”.
“Puna, suksesi dhe përgjegjësia e saj u panë: kur fshehu pasurinë, kur shkeli një fëmijë me veturë, kur bleu grurë nga kompanitë e ndërtimit, por edhe në vjedhjen e rezervave shtetërore”, ka shkruar Çitaku në Facebook.
Tutje, ajo ka shkruar “për keqardhje!”.
Gjatë ditës së sotme, organet e rendit në Kosovë me urdhrin e Prokurorisë Speciale kanë arrestuar drejtorin e departamentit të rezervave shtetërore, Hafiz Garën, drejtorin e departamentin për integrime evropiane, Irgan Lipovica, si dhe afaristin Ridvan Muharremin, nën dyshimet se kanë bërë keqpërdorime sa u përket blerjeve të rezervave shtetërore.
Sipas Prokurorisë Speciale, të arrestuarit dyshohen për veprat penale “keqpërdorim i detyrës zyrtare” dhe “dhënie e ndihmës në kryerjen e veprës penale të keqpërdorimit të detyrës zyrtare”. Tre të arrestuarve iu është caktuar edhe masa a mbajtjes për 48 orë./teve1.info/
