Avokati, Ardian Bajraktari, ka vlerësuar se Gjykata Kushtetuese ka konstatuar se tentimi për ndryshim të rendit të ditës të seancës konstituive, ku nga kryesuesi i seancës është propozuar votimi i fshehtë për zgjedhjet e kryetarit të Kuvendit është në kundërshtim me Kushtetutën dhe me praktikat e deritashme parlamentare.
Ai ka thënë se votimi i kryetarit të Kuvendit në mënyrë të fshehtë nuk i përcaktuar në mënyre eksplicite.
“Gjykata Kushtetuese ka interpretuar edhe mënyrën e votimit, sepse ajo ka qenë njëra prej pikave kyçe dhe të diskutueshme dhe gjykata e ka qartësua në masë të madhe këtë çështje, për faktin se ju ka referuar dispozitave kushtetuese përmes së cilave përcaktohet se kur dhe në çfarë situata mund të votohet në mënyrë të fshehtë. Rasti i votimit të kryetarit të Kuvendit nuk është i përcaktuar në mënyrë eksplicite te votimi i fshehtë edhe sipas praktikave parlamentare nuk është votuar asnjëherë me votim të fshehtë. Prandaj tentativa për ta ndryshuar rendin e ditës, Gjykata ka vlerësua se nuk është në pajtim me Kushtetutën , dispozitat ligjore dhe as më praktikën parlamentare”, ka thënë ai në emisionin “InfoNata”në Tëvë1.
Bajraktari ka thënë se pret që në ditën në vazhdim partitë opozitare të reflektojnë karshi këtij vendimi.
Ai ka thënë se LVV si parti fituese e zgjedhjeve ka dy opsione, krijimin e një shumice parlamentare ose pranimin e kërkesës së partive opozitare të cilat kanë kërkuar ndërrim të kandidaturës.
E propozuara e LVV-së për kryetare të Kuvendit, Albulena Haxhiu të mërkurën tha se ndoshta LVV-ja mund të ndryshojë qëndrim dhe të ketë një kandidaturë tjetër.
