Deputeti i Aleancës për Ardhmërinë e Kosovës (AAK), Lahi Brahimaj, në emisionin “Ditar” në Tëvë1 ka përmendur disa opsione se çfarë mund të ndodhë pas datës 8 gusht, pas vendimit të Gjykatës Kushtetuese lidhur me vazhdimin e procesit të konstituimit të Kuvendit të Kosovës.
Sipas Brahimajt dhe AAK-së, Kushtetuesja mund të vendosë t’I jap LVV-së një afat kohor prej 10 ditësh për ndërrim të kandidatit për kryeparlamentar, mund që t’I jap mundësi partisë së dytë për ta konstituuar Kuvendin ose mund të vendosë për zgjedhje të jashtëzakonshme.
“Ka disa opsione që mendohen sepse nuk ka një precedent që ka ndodhur ndonjëherë, por mendohet që ndoshta do t’i jap edhe një javë a 10 ditë Vetëvendosjes me e sjell një kandidat tjetër, do të thotë do të jap afate kohore të sakta, pastaj t’ia kaloj partisë së dytë dhe një version i tretë mund të jetë shkuarja në zgjedhje të jashtëzakonshme”, ka thënë Brahimaj në emsionin “Ditari” në Tëvë1.
Ndryshe, Gjykata Kushtetuese e Kosovës mori vendim për masë të përkohshme që ndalon deputetët e zgjedhur të ndërmarrin çdo hap drejt formimit të legjislaturës së re deri më 8 gusht. Kjo masë erdhi si pasojë e skadimit të afatit 30-ditor që përfundoi më 26 korrik, brenda të cilit duhej të formohej Kuvendi i ri i Kosovës.
Ndërkaq, gjatë kësaj jave pritet të tregojë se cilat do të jenë pasojat juridike për deputetët e zgjedhur në shkurt të këtij viti dhe çfarë duhet të ndodhë tutje në këtë situatë të pazakontë që ka rëndësi të madhe për të ardhmen institucionale të vendit.
Ngërçi në Kosovë është krijuar si pasojë e mosmarrëveshjeve mes partive politike për mënyrën e konstituimit të kuvendit të ri pas zgjedhjeve parlamentare të 9 shkurtit. Lëvizja Vetëvendosje, që doli e para në zgjedhjet e fundit, këmbëngul që deputetja kosovare, Albulena Haxhiu, të zgjidhet në postin e kryetares së Kuvendit të Kosovës.
Haxhiu është konsideruar figurë përçarëse nga subjektet parlamentare që në legjislaturën e kaluar ishin në opozitë.
