Trend i rritjes së aksidenteve është regjistruar në sezonën e dimrit. Vetëm për një muaj, sipas Policisë së Kosovës ishin nëntë aksidente me fatalitet.
Vetëm për një muaj, nëntë aksidente me fatalitet kanë ndodhur në Kosovë.
Për këtë periudhë kohore, sipas Policisë së Kosovës, ka pasur edhe qindra aksidente trafiku të tjera.
“Gjatë muajit nëntor 2024 janë evidentuar 9 aksidente fatale, 633 aksidente me lëndime dhe 1100 aksidente me dëme materiale. Policia ka shqiptuar 56478 gjoba për shkelësit e rregullave të trafikut”, thuhet nga Policia e Kosovës.
Ky numër i madh i aksidenteve, vlerësohet se vjen si rezultat i sezonës së dimrit dhe mospërshtatjes së shoferëve me ndryshimet klimatike.
“Gjatë sezonit veror që është bërë një vozitje, dhe deri sa të kthehet ajo ndjenja që duhet të kemi kujdes sidomos në orët e hershme të vozitjes, për shkak se normalisht rrugët janë me lagështi apo me ngrica, sepse jemi në sezonën e dimrit. E kjo pjesë ndikon tek shoferët sepse gjithmonë kur lëviz me mjet në mëngjes, e harron që tani është muaji i dymbëdhjetë dhe kërkohet kujdes më i shtuar”, tha njohësi i komunikacionit, Lavdim Hamiti.
Megjithatë, shpejtësia llogaritet të jetë ndër shkaktarët kryesor të aksidenteve.
“Te pasë parasysh që shpejtësia është aktive prej janarit deri në dhjetor, pra tërë vitin, atëherë ne e shohim si masë preventive duhet të jetë një punë e sinkronizuar mes institucioneve. Në mënyrë që elementin e faktori njeri, ta zbusim ose edhe ta çojmë në minimum”, tha profesori universitar, Nol Dedaj.
Këtë vit, ka hyrë në fuqi edhe ligji i ri për trafikun rrugor, i cili ashpërsonte dënimet për shkelësit e rregullave të trafikut.
