Dy ditë pasi Zelanda e Re u trondit nga dorëheqja e papritur e kryeministres Jacinda Ardern, tashmë vendi ka një kandidat të ri për këtë post.
Ministri i Arsimit Chris Hipkins do të bëhet kryeministri i ardhshëm i Zelandës së Re pasi ai ishte i vetmi kandidat që hyri në garë .
Hipkins, 44 vjeç, duhet të marrë ende një miratim të dielën nga kolegët e tij të Partisë Laburiste në Parlament, por raportohet se ky është thjesht një formalitet tani.
Duke folur me gazetarët në Wellington të shtunën, Hipkins u shpreh i bindur se mund të fitonte zgjedhjet, ndërsa lavdëroi punën e Ardern si kryeministre.
“Jacinda Ardern ka qenë një kryeministre e jashtëzakonshme për Zelandën e Re. Ajo ishte liderja që na nevojitej në kohët e vështira. Më ka pëlqyer shumë të jem ministër në qeverinë e Jacinda Ardern. Mendoj se publiku i Zelandës së Re e ka parë punën që kam bërë. Ju e dini, jam marrë me disa situata sfiduese gjatë pesë viteve të fundit. Nuk pretendoj të jem dikush që nuk jam. Nuk e kam bërë kurrë këtë dhe nuk do ta bëj as tash”, tha Hipkins.
Hipkins do të ketë më pak se tetë muaj në këtë rol përpara zgjedhjeve të përgjithshme të Zelandës së Re që pritet të mbahen në tetor.
Ndër sfidat e tij më të mëdha gjatë një viti zgjedhor do të jetë të bindë votuesit se partia e tij po e menaxhon mirë ekonominë.
Shkalla e papunësisë në Zelandën e Re është relativisht e ulët në 3.3%, por inflacioni është i lartë në 7.2% dhe disa ekonomistë po parashikojnë se vendi do të shkojë në recesion këtë vit./Teve1.info/
