Rikthimi i Federico Chiesas te Juventusi duket një skenar gjithnjë e më realist. Zërat e merkatos po marrin konfirmime konkrete: sulmuesi i Kombëtares italiane është i gatshëm të rikthehet në Serie A, pikërisht te bardhezinjtë e Torinos, skuadër të cilën e la rreth një vit e gjysmë më parë për shifrën prej afro 12 milionë eurosh.
Pas një periudhe të vështirë në Angli, Chiesa ka kuptuar se e ardhmja e tij te Liverpooli është e pasigurt.
Edhe pse është stërvitur gjithmonë me intensitet maksimal, Chiesa nuk ka marrë kurrë një mundësi reale për të ndryshuar hierarkitë në skuadër, madje as kur rezultatet nuk kanë qenë bindëse. Deri tani ka grumbulluar rreth 500 minuta lojë, duke shënuar dy gola në Premier League ndaj Bournemouth dhe Crystal Palace.
Nga ana tjetër, Juventusit i ka thënë “po”. Rikthimi i besimit ka qenë vendimtar për Chiesan, sidomos nga Luciano Spalletti, i cili ka qenë gjithmonë një nga mbështetësit e tij kryesorë, si dhe nga Giorgio Chiellini, me të cilin ndau triumfin e madh të Italisë në Euro 2021.
Megjithatë, për të arritur marrëveshjen finale nevojitet durim. Fillimisht duhet gjetur akordi me Liverpoolin, i cili aktualisht ka refuzuar një huazim me të drejtë blerjeje. Klubi anglez kërkon ose një transferim të përhershëm, ose një detyrim blerjeje, për një shifër mbi 10 milionë euro. Për më tepër, “Reds” kanë kërkuar të presin edhe disa ditë.
Arsyeja lidhet me situatën në repartin ofensiv: Isak dhe Ekitike janë të dëmtuar (me francezin drejt rikuperimit), ndërsa Mohamed Salah ndodhet në Kupën e Afrikës. Kjo e bën Chiesan një alternativë të vlefshme për ndeshjet e ardhshme, përfshirë përballjen e rëndësishme të kampionatit ndaj Arsenalit dhe atë të FA Cup kundër Barnsley në “Anfield”. Një pikëpyetje mbetet edhe sfida me Burnley më 17 janar, në varësi të rrugëtimit të Egjiptit në Kupën e Afrikës.
Ndërkohë, tifozët janë të ndarë dhe reagimet kanë qenë të forta. Disa presin me entuziazëm rikthimin e Chiesas në Torino, ndërsa të tjerë shprehin dyshime për kushtet fizike dhe koston e operacionit
