Chelsea po përgatitet të hyjë sërish në garë për portierin e Milanit, Mike Maignan, duke e bërë atë një nga objektivat kryesorë për repartin e portës.
Vendimi për të ringjallur interesimin ndaj gardianit francez vjen pas një sërë paraqitjesh jo bindëse të Robert Sanchez, kulmuar me gabimet e tij në përballjen kundër Manchester United, që kanë shtuar presionin mbi drejtuesit e klubit londinez.
Maignan, i cili konsiderohet një nga portierët më të mirë në botë, ka kontratë me kuqezinjtë vetëm deri në verën e ardhshme. Ky fakt e bën situatën edhe më të ndërlikuar për Milanin, pasi nëse nuk rinovohet marrëveshja, ai do të jetë i lirë të negociojë me çdo skuadër tjetër që në merkaton e janarit.
Chelsea, që kërkon stabilitet dhe garanci në portë, është i gatshëm ta shfrytëzojë këtë hapësirë për t’i siguruar shërbimet e tij.
Është e rëndësishme të theksohet se gjatë afatit veror, londinezët ishin shumë pranë arritjes së një marrëveshjeje për transferimin e Maignan në “Stamford Bridge”. Megjithatë, plani u ndërpre pas emërimit të Massimiliano Allegrit si trajner i Milanit. Tekniku italian e cilësoi 29-vjeçarin një pjesë themelore të projektit të tij dhe arriti të bindë drejtuesit që ta mbajnë në skuadër, pavarësisht ofertave të mëdha financiare që vinin nga Liga Premier.
Tashmë, situata ka marrë një kthesë të re. Chelsea duket i vendosur të bëjë një tjetër tentativë, ndërkohë që presioni mbi drejtuesit e Milanit po shtohet për të vendosur të ardhmen e portierit.
Nëse nuk arrihet një akord për rinovim së shpejti, mundësia që Maignan të përfundojë në Londër sezonin e ardhshëm është më reale se kurrë.
