Tuneli në Kurriz të Prishtinës është duke u rinovuar që nga data 30 e muajit shtator e pritet të zgjasë disa muaj. Të pakënaqur me këto punimet po shprehen qytetarët.
Punime pati edhe këtë të mërkurë.
E kështu do vazhdojnë edhe ca muaj të tjerë.
Kjo pasi do të bëhet renovimi artistik dhe infrastrukturor i tunelit të Kurrizit në Dardani.
E me këto punime janë të pakënaqur qytetarët.
“E vetmja gjë që më ka rënë në sy e që është problematike është afati shumë i gjatë i rindërtimit ose meremetimit, shumë është ajo sa pi bjen 250 a 260 ditë”, thotë Mahmut Maxhuni.
“Pa koment , pa koment skom çka thom pa koment është kjo”, shprehet Adile Osmanaj.
Por njëjtë nuk po mendon edhe ky banor.
“Kurgjo nuk mundemi me pasë më mirë në rastë se nuk mundohemi pak”, shprehet ai.
Nga opozita në komunën e Prishtinës thonë se kanë pranuar ankesa lidhur me mbylljen e tunelit.
“Po pikë së pari unë kam pranu kërkesa, ankesa prej qytetarëve të Dardanisë, që tri herë kanë intervenu do të thotë gjatë mandatit të Ramës në pjesën e Kurrizit, tri herë domethënë është mbyllë kurrizi tu bo do të thotë shkel e shko punime në një farë mënyre ata janë blloku edhe qytetarët edhe banorët edhe veturat”, thotë Besart Krasniqi- asambleist VV-së në Prishtinë.
Sipas të parit të Prishtinës, Përparim Rama, tuneli do të shndërrohet në një qendër aktive për aktivitetet kulturore dhe komerciale.
Mirëpo edhe këtë ide, sipas Krasniqit banorët po e kundërshtojnë.
“Tjetra ankesë që na e kemi pranu është që aty ka me qenë rruga një kahe dhe ka me pas kafene dyqane dhe këtë pjesë qytetarët banorët e Dardanisë janë tu e kundërshtu kategorikisht për shkak se veç ka mu ngulfatë qysh është tuneli i mbylltë. Po ashtu edhe me rrugë një kahshe por në njërën anë edhe me kafiteri ose ky ka thanë që ka me pas edhe koncerte kështu që nuk e di ku ka mi mbajtë ato koncerte në atë hapësire aq të ngushtë”, thotë ai.
Projekti që kap shumën e 1.3 milion euro pritet të përfundojë brenda tetë muajsh.
Kronika e realizuar nga Fëllënza Krasniqi
