Shtëpia e Bardhë publikoi zyrtarisht planin e saj të paqes me 20 pika përpara konferencës për shtyp mes presidentit amerikan, Donald Trump dhe kryeministrit izraelit, Benjamin Netanyahu pas takimit të tyre në Shtëpinë e Bardhë.
Plani ndër të tjera thotë se: “Nëse të dyja palët bien dakord me këtë propozim, lufta do të përfundojë menjëherë”.
Sipas kushteve të marrëveshjes, “forcat izraelite do të tërhiqen në vijën e rënë dakord për t’u përgatitur për lirimin e pengjeve” dhe të gjithë pengjet do të lirohen brenda 72 orëve, thuhet në njoftimin e Shtëpisë së Bardhë.
“Gjatë kësaj kohe, të gjitha operacionet ushtarake, përfshirë bombardimet ajrore dhe të artilerisë, do të pezullohen dhe linjat e betejës do të mbeten të ngrira derisa të plotësohen kushtet për tërheqjen e plotë në faza”, tha ajo.
“Sapo të kthehen të gjithë pengjet, anëtarët e Hamasit që angazhohen për bashkëjetesë paqësore dhe për çmontimin e armëve të tyre do të amnistohen”, vazhdoi njoftimi. “Anëtarëve të Hamasit që dëshirojnë të largohen nga Gaza do t’u sigurohet kalim i sigurt drejt vendeve pritëse.”
Plani tërhiqej nga një propozim i mëparshëm për zhvendosjen e banorëve të Rripit të Gazës, duke thënë se “Gaza do të rindërtohet në dobi të popullit të Gazës, i cili ka vuajtur më shumë se sa duhet”.
Plani parashihte edhe që zona do të “qeveriset nën qeverisjen e përkohshme kalimtare të një komiteti palestinez teknokratik dhe apolitik, përgjegjës për ofrimin e funksionimit të përditshëm të shërbimeve publike dhe komunave për njerëzit në Gaza”, thuhet në njoftim, raporton NBC News.
“Ky komitet do të përbëhet nga palestinezë të kualifikuar dhe ekspertë ndërkombëtarë, me mbikëqyrje nga një organ i ri ndërkombëtar kalimtar, ‘Bordi i Paqes’, i cili do të drejtohet dhe do të kryesohet nga Presidenti amerikan, Donald Trump, me anëtarë të tjerë dhe krerë shtetesh që do të shpallen më vonë, përfshirë ish-kryeministrin Tony Blair”, thuhet në të.
Propozimi thotë gjithashtu se, “Pas pranimit të kësaj marrëveshjeje, ndihma e plotë do të dërgohet menjëherë në Rripin e Gazës”.
