Presidenti amerikan, Donald Trump hapi turneun e tij 4-ditor në Gjirin Persik, me një vizitë në mbretërinë e Arabisë Saudite, e para kjo zyrtare që nga marrja e mandatit të dytë, ku u prit nga Princi i Kurorës, Muhammad bin Salman.
Përzgjedhja e Arabisë Saudite nga presidenti amerikan si ndalesa e parë në turneun e tij të parë zyrtar pasqyron peshën gjeopolitike dhe rëndësinë ekonomike të mbretërisë për SHBA-të.
Ata u takuan së bashku me zyrtarë nga të dy vendet në Pallatin Al Yamamah.
Të dy udhëheqësit morrin pjesë në një drekë në oborrin mbretëror, ku të pranishëm ishin edhe shumë figura biznesi, në mesin e tyre edhe CEO i Tesla-së dhe SpaceX, tashmë pjesë e administratës Trump, Elon Musk.
Dy liderët pritej të bisedonin për çështje të rëndësishme gjeopolitike, në mesin e tyre, përpjekja për arritjen e një armëpushimi në Gaza dhe programi bërthamor i Iranit.
Por, aspekti ekonomik sërish lë në hije problemet gjeopolitike.
Trump pasi e quajti mik kreun e mbretërisë, të dy liderët shtrënguan duart dhe nënshkruan një numër marrëveshjesh ekonomike dhe ushtarake.
Marrëveshja përfshinë bashkëpunimin në energji, modernizimin e forcave të armatosura saudite, bashkëpunimin gjyqësor midis Ministrisë së Drejtësisë dhe gjyqësorit saudit, ndihmën midis autoriteteve doganore dhe bashkëpunimet midis Muzeut Smithsonian dhe institucioneve saudite.
Marrëveshjen në vlerë prej afër 142 miliardë dollarë, Shtëpia e Bardhë e ka quajtur si “ marrëveshja më e madhe e shitjes së mbrojtjes në histori”, raporton BBC.
Ajo i siguron Mretërisë, pajisje dhe shërbime luftarake të teknologjisë së fundit nga mbi një duzinë firmash mbrojtëse amerikane. Në pako përfshihet poashtu trajnimi dhe mbështetja e gjerë për të ndërtuar kapacitetin e forcave të armatosura saudite.
Si shkëmbim, sauditët do investojnë rreth 20 miliardë dollarë në inteligjencën artificiale në SHBA.
Më vonë, princi i Kurorës do ta pres Trumpin në një darkë zyrtare.
Trump është planifikuar gjithashtu të marrë pjesë në një konferencë investimesh SHBA- Arabi Saudite më vonë të martën.
Pas Arabisë Saudite, Trump do vazhdojë vizitat për në Emiratet e Bashkuara Arabe dhe Katar.
