Tarifa prej 10% ndaj Shteteve të Bashkuara të Amerikës, u hoq përmes një vendimi të qeverisë në detyrë.
Ani pse po cilësohet si vendim i vonuar, po mirëpritet nga njohës të fushës së ekonomisë.
Madje, kërkohet që kjo të shfrytëzohet për të mirën edhe të bizneseve vendore.
“Ka rëndësi enorme ekonomike, por mbi të gjitha është një mundësi e cila duhet të promovohet, që vërtetë bashkëpunimi ekonomik mes Kosovës dhe ShBA-së, të jetë shumë i madh se sa që është në këtë nivel aktualisht. Duhet përkushtim politik që të mbështetet sektori privat, sepse vetëm përmes fuqizimit të sektorit privat dhe promovimit të produkteve Made in Kosova, të cilat i arrijnë standardet dhe certifikimet e duhura, mund të arrijmë të bëhemi partner të denjë ekonomik për ShBA-në”, tha njohësi i ekonomisë, Safet Gërxhaliu.
Largimi i kësaj tarife doganore, shpresohet se mund të ndikojë edhe në heqjen e tarifës së SHBA-së ndaj Kosovës, e cila hyri në fuqi ditë më parë.
“Vendimi i Qeverisë së Kosovës, mund të ndikojë, shpresojmë tek administrate amerikane që të rishikojë vendimin e saj. Meqenëse, në fund të fundit besoj që do të ketë një qasje fleksibile, meqë është masë reciprociteti, atëherë përgjigja reciproke të jetë në heqjen e plotë të tarfiave doganore për mallrat nga Kosova”, tha Arian Zeka nga Oda Ekonomike Amerikane.
Së fundmi SHBA, ka bërë publike listën e vendeve ndaj të cilave do të fuqizohen taksa të reja, por që në të nuk përfshihet shteti i Kosovës.
