Një tragjedi ka ndodhur mëngjesin e së martës në një shkollë të mesme në Graz të Austrisë.
10 persona mbetën të vrarë, pas të shtënave në një shkollë të mesme në Graz të Austrisë, përfshirë dhe autori i dyshuar i cili vdiq, ka konfirmuar kryebashkiaku i qytetit.
Të shtënat ndodhën rreth orës 10 të mëngjesit në shkollën e mesme Dreierschützengasse, rreth një km nga qendra historike e Grazit, ku edhe u dërguan forcat speciale pas një telefonate që morrën.
Zyrtarët policorë thanë se viktimat përfshinin studentë dhe një të rritur. Mediat lokale kanë raportuar se të paktën 30 persona të plagosur janë dërguar në spital për të marrë trajtim.
Sulmi besohet se erdhi nga një ish-nxënës, 21-vjeçar, i cili më pas vrau veten.
I dyshuari për të shtënat ishte një shtetas austriak që jetonte në Graz dhe policia tha se nuk kishte precedentë të mëparshëm penalë.
Ata besojnë se sulmuesi veproi si i vetëm.
Menjëherë pas sulmit pati reagime nga politikanë të Komisionit evropian të cilët e dënuan sulmin.
“Do të donim t’u shprehim ngushëllimet tona më të thella familjeve të viktimave dhe të gjithë qytetit të Grazit, dhe qëndrojmë së bashku në zi, ndërsa kërkojmë sqarim pas kësaj ngjarjeje të tmerrshme në një shkollë”, ka thënë zëdhënësja e shefit të Komisionit të BE-së, Paula Pinho.
Kancelari i Austrisë, Christian Stocker sulmin e ka cilësuar si një “tragjedi kombëtare”, dhe ka thënë se i gjithë vendi ndihet thellësisht i tronditur.
I njëjti konfirmoi se Austria do të mbajë një minutë heshtje kombëtare të mërkurën, në orën 10:00, dhe do të shpallë tre ditë zie kombëtare. /teve1/
