Në këto lista, u shënuan plot 60 mijë persona. E të gjitha këta, deklaruan se ishin pjesëtar të Ushtrisë Çlirimtare të Kosovës.
Por, ky numër i veteranëve, kryeministrit të Kosovës, po i duket goxha i fryrë.
Së fundmi, në një emision televiziv, ai deklaroi se numri i veteranëve të vërtetë, nuk e kalon 20 mijëshin.
Në këtë formë, kryeministri, ka kthyer edhe një herë në diskutim çështjen e veteranëve të rrejshëm.
Madje për këtë, të premten e kaluar shefi i ekzekutivit, pati një takim me ushtruesin e detyrës së kryetarit të OVL-UÇK-së, Faton Klinakun.
Por, a pati tensione në këtë takim?
“Nuk pati tensione …… edhe unë para 4 vitesh kam thënë se nuk mund të ketë më shumë sesa 25 mijë veteranë, edhe KFOR-i ka thënë 25 mijë, me logjistikë kemi thënë se mund të jetë dikund 30 mijë”, tha Klinaku.
Ai në emisionin Ditari në Tëvë1, ka deklaruar se s’mund të pastrohen tani listat e veteranëve.
“Nuk mund të bëhet verifikim i veteranëve të luftës përderisa lënda është në gjykatë dhe ne atë çështje e kemi dërguar në gjykatë me thirrjen që e kemi bërë si organizatë që prokuroria ta hetojë e tani rasti është në gjykatë dhe pastaj këto tjerat që i flasin njerëzit nëpër televizione janë veç lojëra fjalësh sepse nuk mund të ndërhyjë përderisa rasti është në gjykatë”, ka shtuar ai.
Ndërkohë i pari e AAK-së, Ramush Haradinaj, thotë se tani nuk është koha të flitet për këtë temë.
“Nuk e meritojnë ofendimin që bash në këtë kohë, me e fillu edhe njëherë me i fillu diskutimet se kush është veteran i vërtetë, apo jo; kush është luftëtar i vërtetë apo jo. Nuk është koha e tillë. Ka pasur edhe një proces gjyqësor. Tash është koha kur duhet t’i respektojmë e t’i nderojmë ata”, ka deklaruar Haradinaj.
Ndërkohë nga qeveria e Kosovës, kanë thënë se me përfaqësuesit e OVL-UÇK-së diskutuan edhe çështjen e pastrimin të listave, gjë për të cilën, veteranët shprehën gatishmëri për të gjetur mundësitë e bashkëpunimit në të ardhmen me Qeverinë.
Raporti i gazetarit Fidan Zejnullahu.
