Partia që kryeministri në detyrë, Albin Kurti drejton, ka siguruar 53 ulëse në legjislaturën e re të Kuvendit.
Numrat do t’i mjaftojnë për votimin e kryetarit të Kuvendit dhe Qeverisë, mirëpo jo edhe për Presidentin.
Të martën, Kurti refuzoi të komentoj nëse ka nisur diskutimet me partitë tjera.
Shkurt tha se janë në pritje të certifikimit të rezultateve.
“Porsa të certifikohen rezultatet do të fillojnë komunikimet menjëherë”, u shpreh Kurti.
Për çështjen e bashkëpunimit me Lëvizjen Vetëvendosje, TËVË1 ka dërguar pyetje në drejtim të të gjitha partive politike.
Megjithatë, deri në publikimin e kronikës nuk ka pranuar përgjigje zyrtare.
Një qeveri me një shumicë minimale, analistët vlerësojnë se nuk do t’i shkonte për shtati Kurtit.
“Megjithatë do të kishim një Qeveri me numra mjaft të brishtë andaj mendoj se z.Kurti i vetdijshëm për këtë situatë po kërkon që të ketë edhe një partner në qeverisje e pse jo nesër ta ketë edhe më të lehtë zgjedhjen e Presidentit të vendit. Natyrisht për zgjedhjen e presidentit i duhet me patjetër partisë politike fituese LVV-së që të zgjedhë dikë nga partnerët”, vlerwson Ejup Gojnovci – analist politik.
Sipas tij, në rrethana aktuale, një koalicion do të ndodhë, por që ende nuk dihet se kush është më i preferuari i Vetëvendosjes.
“Është mirë që kësaj valleje po i prinë z.Kurti si fitues të këtyre zgjedhjeve. Mbetet të shihet se cili do të jetë reagimi i partive tjera, partive opozitare dhe cila do të jetë oferta e z.Kurti për to, nëse do të kemi bashkëpunim më të gjerë apo vetëm në situatën për zgjedhjen e presidentit të vendit”, shprehet Gojnovci.
Sipas Ligjit për Zgjedhje, afati për certifikimin e rezultateve zgjedhore është një muaj pas përfundimit të numërimit.
