Kandidatja e Lëvizjes Vetëvendosje për deputete, Krenare Çerkini, ka deklaruar se zgjedhjet e parakohshme parlamentare të 7 qershorit do të jenë të fundit të këtij lloji në vend.
E ftuar në emisionin “Info Nata” në Tëvë1, Çerkini ka thënë se rezultatet që, sipas saj, po i sheh LVV-ja në terren gjatë fushatës zgjedhore, japin arsye për të besuar në një tjetër fitore të subjektit të saj politik.
“Edhe pse këto zgjedhje kanë qenë të panevojshme në këtë moment, unë shpresoj dhe besoj se do të jenë zgjedhjet e fundit të jashtëzakonshme. Pas 7 qershorit do të mundësohet vazhdimësia e një qeverisjeje që ia kemi borxh vendit dhe qytetarëve për të çuar përpara procese që janë në të mirën e tyre”, ka deklaruar ajo.
E pyetur nëse Lëvizja Vetëvendosje druhet se mund të ndëshkohet nga qytetarët për shkak të shkuarjes së vendit sërish në zgjedhje, Çerkini është shprehur se nga takimet me qytetarët nuk ka vërejtur një perceptim të tillë.
Sipas saj, një nga temat kryesore që diskutohen gjatë fushatës është sqarimi i rrethanave që çuan vendin në zgjedhje të reja.
“Qytetarët tashmë janë të vetëdijshëm për atë që ka ndodhur dhe pse vendi ka shkuar në zgjedhje. Ata shohin dy alternativa: nga njëra anë bllokadat politike që, sipas nesh, krijohen për interesa të caktuara, dhe nga ana tjetër një qeverisje që e ka dëshmuar veten në vitet e fundit. Kemi besimin se më 7 qershor do të vuloset një tjetër fitore e Lëvizjes Vetëvendosje dhe do të vazhdojë puna e nisur”, tha Çerkini.
Në fund, ajo ka ritheksuar se, sipas vlerësimit të saj, qytetarët nuk e konsiderojnë LVV-në përgjegjëse për mbajtjen e zgjedhjeve të reja./teve1.info./
