Ministri në detyrë i Arsimit dhe Shkencës, Hajrullah Çeku, ka vizituar Sindikatën e Bashkuar të Arsimit, Shkencës dhe Teknologjisë (SBASHK), me rastin e fillimit të vitit të ri shkollor.
Sipas njoftimit të Ministrisë së Arsimit, Çeku është pritur në takim nga kryetari Rrahman Jasharaj, nënkryetarja Vjollca Shala dhe sekretari i përgjithshëm Ymer Ymeri.
Në takim, siç bëhet e ditur në vetë njoftimin e ministrisë, është diskutuar lidhur me rëndësinë e bashkëpunimit ndërmjet institucioneve dhe përfaqësuesve të komunitetit arsimor, si dhe për përgatitjet rreth fillimit të vitit të ri shkollor.
“Gjatë takimit u diskutua për përgatitjet rreth fillimit të vitit të ri shkollor, rolin kyç të mësimdhënësve, rëndësinë e bashkëpunimit ndërmjet institucioneve dhe përfaqësuesve të komunitetit arsimor, dhe përgjegjësitë, përveçse synimin e përbashkët për cilësi të arsimit në vend”, bëhet e ditur në njoftim.
Tutje, bëhet e ditur se kryetari i SBASHK-ut vlerësoi vizitën e ministrit, si dhe shprehu mbështetjen për Strategjinë e Arsimit 2035+, duke e cilësuar, siç thuhet në njoftim, si një dokument të rëndësishëm për zhvillimin e sektorit të arsimit gjatë dhjetëvjeçarit të ardhshëm.
