Ministri i Arsimit dhe Shkencës i Kosovës, Hajrulla Çeku, është pritur në Tiranë nga ministrja e Arsimit të Shqipërisë, Mirela Kumbaro Furxhi, në vizitën e tij të parë zyrtare si ministër.
Lajmin e ka bërë të ditur vetë Kumbaro përmes një postimi në Facebook, ku ka theksuar rëndësinë simbolike të takimit, i cili përkon me nisjen e Olimpiadës së dytë të përbashkët Shqipëri–Kosovë në shkollat 9-vjeçare për gjuhën shqipe.
“Kënaqësi e veçantë të mirëprisja në Ministrinë e Arsimit homologun dhe mikun Hajrulla Çeku, në vizitën e tij të parë zyrtare në Tiranë si Ministër i Arsimit dhe Shkencës i Kosovë, në një moment që merr vlerë simbolike siç është nisja e Olimpiadës së dytë të përbashkët në të gjitha shkollat 9-vjeçare në Shqipëri dhe Kosovë për gjuhën shqipe – identiteti që na bashkon ndër shekuj”, ka shkruar Kumbaro.
Ajo ka shtuar se bashkëpunimi mes dy ministrive do të forcohet edhe në arsimin parauniversitar dhe atë të lartë, duke përfshirë projekte si Seminari i Gjuhës dhe Kulturës Shqipe dhe Festa e Abetares, e cila këtë vit do të mbahet në Kosovë.
Po ashtu, Kumbaro ka theksuar se është duke u punuar për unifikimin e kurrikulave dhe programeve mësimore, si dhe për botimin e teksteve të përbashkëta për diasporën, tashmë të digjitalizuara./teve1.info/
