Kandidati i Lëvizjes Vetëvendosje për kryetar të Prishtinës, Hajrulla Çeku ka premtuar krijimin e tregjeve mobile për produktet vendore, si dhe skema për grante të vogla që mbështesin bizneset familjare.
Ai ka theksuar se familjet në fshat do të kenë mundësi të jetojnë me dinjitet nga puna e tyre, ndërsa familjet në qytet do të kenë qasje në produkte cilësore vendore.
“Në Vranidoll vizituam fermën e Sabri Bekollit. Bashkë diskutuam për veprimtarinë e tij plot vlerë, e për sfidat me te cilat përballet. Puna e palodhur e këtij fermeri dhe e shumë të tjerëve do të mbështetet me projekte konkrete edhe në nivel komunal. Platforma jonë parasheh krijimin e tregjeve mobile për produktet vendore, si dhe skema për grante të vogla që ndihmojnë këto biznese familjare të zhvillohen. Familjet në fshat do të kenë mundësi të jetojnë me dinjitet nga puna e tyre. Kurse familjet në qytet do të kenë qasje në produkte cilësore vendore. Bashkë, për Prishtinën tone”, ka shkruar ai në Facebook.
Ndryshe, sot ka nisur zyrtarisht fushata për raundin e dytë të zgjedhjeve në garën për kryetar komunash që do të zhvillohet më 9 nëntor.
Raundi i dytë i zgjedhjeve për kryetarë komunash do të zhvillohet në 18 komuna: Gjakovë, Gjilan, Dragash, Kaçanik, Klinë, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot./teve1.info/
