Ministri i Kulturës për Rini dhe Sport, Hajrullah Çeku, ka bërë të ditur se ka kërkuar bashkëpunim për sanimin e dëmeve të Manastirit të Banjskës në Zveçan, të shkaktuara nga sulmi terrorist i datës 24 shtator.
Çeku, tha se është duke u konkretizuar shkresa zyrtare drejtuar Dioqezës Rashkë – Prizren.
“Zotimin e dhënë në mbledhjen e Qeverisë së Kosovës të datës 27 shtator 2023 për sanimin e dëmeve në Manastirin e Banjskës në Zveçan, të shkaktuara nga sulmi terrorist i datës 24 shtator, po e konkretizojmë më shkresën zyrtare drejtuar Dioqezës Rashkë – Prizren”, ka shkruar ministri në Facebook.
Tutje, ai ka bërë thirrje autoriteteve të Kishës Ortodokse Serbe në Kosovë për bashkërendimin të veprimeve deri në ndërhyrjet e nevojshme restauruese për sanimin e dëmeve.
“Konform detyrimeve, autorizimeve kushtetuese dhe ligjore ftojmë autoritetet e Kishës Ortodokse Serbe në Kosovë për bashkërendim të veprimeve deri në ndërhyrjet e nevojshme restauruese për sanimin e dëmeve në këtë aset të trashëgimisë kulturore”, ka shkruar tutje Çeku./teve1.info/
