Çaslav Joliq, nuk erdhi të premten për të dëgjuar vendimin e Gjykatës për të, pas rigjykimit.
Joliq u shpall sërish fajtor për torturimin dhe maltretimin e popullsisë civile në komunën e Istogut, nga janari i vitit 1998 e deri në qershor të vitit 1999.
“Kjo Gjykatë, e gjenë fajtor për pikën a të përshkrimit faktik të aktakuzës, respektivisht për veprën penale krime lufte kundër popullsisë civile nga neni 142 lidhur me nenin 22 sipas ligjit që ka qenë në fuqi në kohën e kryerjes së veprës penale”, tha kryetari I trupit Gjykues, Ngadhnjim Arrni.
Ai u shpall i pafajshëm për pikat tjera të aktakuzës.Në rigjykim, Joliqit iu ulë dënimi në pesë vite e gjysmë burgim.
“Për këto veprime, të njëjtin e gjykon prej pesë vite e gjashtë muaj burgim, ku koha e kaluar nën masën e paraburgimit i llogaritet në dënimin e shqiptuar”, shtoj tutje Arrni.
Kryetari i trupit gjykues, tregoi se pse kanë vendosur që të mos hapet shqyrtimi gjyqësor në këtë rast.
“Pas seancës për këshillim dhe votim, trupi gjykues ka vlerësuar se nuk nevojitet që përsëri të hapet shqyrtimi gjyqësor për plotësimin e procedurës ose për sqarimin e ndonjë çështje konkrete”,ka përfunduar Arrni.
Çaslav Joliq, ishte dënuar vitin e kaluar me tetë vite burgim, por që Apeli e kishte rrëzuar.
