Ish-deputeti i Lidhjes Demokratike të Kosovës, Visar Xani ka deklaruar se partia e tij është e gatshme të shqyrtojë çdo ftesë serioze për bashkëpunim politik që do të mundësonte krijimin e institucioneve të reja, duke përjashtuar bashkëpunimin me Listën Serbe.
Sipas Xanit, vendi ka humbur kohë të çmuar në procesin e formimit të institucioneve dhe partitë politike duhet të tregojnë përgjegjësi për të tejkaluar bllokadën aktuale.
“Përveç me Listën Serbe, me të gjitha partitë e tjera që na mundësojnë krijimin e institucioneve, LDK-ja është e gatshme. Kurdo që vjen një ftesë serioze, besoj se duhet t’i përgjigjemi secilit subjekt politik që mund të kontribuojë në formimin e institucioneve dhe në avancimin e projekteve të rëndësishme për vendin”, ka deklaruar Xani në emisionin “Ditari” në Tëvë1.
Ai ka theksuar se brenda LDK-së ekziston vullneti për të mos qenë faktor bllokues në proceset politike dhe se partia është e gatshme për kompromis politik në interes të vendit.
“Ndjesia brenda LDK-së është që të mos jemi bllokues. Duhet të ketë qasje serioze nga partia e parë dhe LDK-ja e ka thënë se është e gatshme të bëjë kompromis politik për krijimin e institucioneve. Duhet të ulemi dhe të shohim se ku mund të kontribuojmë”, është shprehur ai.
Xani ka kujtuar edhe deklarimet e mëhershme të ish-presidentes Vjosa Osmani se nuk dëshiron që emri i saj të përdoret si arsye për ta çuar vendin në zgjedhje të reja, duke theksuar se fokusi duhet të mbetet te gjetja e një zgjidhjeje politike për formimin e institucioneve./teve1.info/
