Analisti, Blerim Canaj ka vlerësuar se qëndrimi i ish-zyrtarit amerikan, James Rubin ndaj Gjykatës Speciale është pasqyrim i qasjes së Shteteve të Bashkuara në raport me këtë institucion.
Sipas Canaj-t, qëndrimi i Rubinit duhet kuptuar si një mesazh që reflekton shqetësimet e SHBA-ve për mënyrën se si ka funksionuar Gjykata Speciale gjatë këtij procesi.
“Qëndrimi i James Rubin nuk është vetëm qëndrim i tij në raport me Gjykatën Speciale, por është qëndrim i Shteteve të Bashkuara të Amerikës dhe nuk është se ne po e dëgjojmë për herë të parë këtë. Prandaj, mendoj se kjo nuk është vetëm një mendim që duhet ta lexojmë si vendim vetëm të James Rubin, por mendoj se duhet ta lexojmë si një mendim dhe qasje që e kanë ShBA-të në raport me Specialen. Duke pasur parasysh që edhe SHBA-të së bashku me shtetet tjera perëndimore kanë pas bërë njëfarë presioni goxha të madh që të ndërtohet kjo gjykatë sikur edhe ata janë pishman po them për shkak të qasjes që e ka marrë Gjykata Speciale gjatë rrugës. Andaj prapë po e përsëris që ishte qasje thjesht e Shteteve të Bashkuara të Amerikës dhe është shpresdhënëse”, ka thënë ai në emisionin “Info Nata” në Tëvë1.
Ndryshe, në vijim të dëshmisë në Hagë, James Rubin, të martën tregoi arsyet pse ai ka refuzuar të jetë dëshmitar i Prokurorisë në rastin gjyqësor ndaj Hashim Thaçit dhe të tjerëve, duke thënë se kjo ka të bëjë me pikëpamjet e tij për Gjykatën Speciale.
Ish-zyrtari i lartë amerikan e quajti “të padrejtë” mbajtjen për pesë vjet në paraburgim të të akuzuarve, të cilët, sipas tij, u dorëzuan vullnetarisht.
