Kryeministri i Kosovës, Albin Kurti mirëpriti sot në një darkë pune Sekretarin e Punëve të Jashtme të Mbretërisë së Bashkuar, Lord David Cameron, i cili po e viziton Kosovën për herë të parë.
Në këtë takim Kurti ka uruar Cameron për detyrën e re, dhe falënderuar për mbështetjen ndaj Kosovës në kohën kur ishte kryeministër i Britanisë së Madhe.
Sipas komunikatës së Zyrës së Kryeministri Kurti e njoftoi atë për sfidat në vitin 2023 si dhe për përkushtimin e tij .
“ Kryeministri Kurti e njoftoi Sekretarin Cameron me progresin dhe arritjet e Kosovës, veçanërisht në tri vitet e fundit, sa në aspektin ekonomik ashtu edhe demokratik e të sundimit të ligjit. Foli për sukseset dhe sfidat e vitit 2023 dhe përkushtimin e tij dhe Qeverisë së Republikës së Kosovës për zhvillim ekonomik krahas luftimit të krimit dhe korrupsionit, ngritje të mirëqenies së qytetarëve përmes punësimit dhe politikave të duhura sociale, dhe garantim të sigurisë dhe paqes në vend përballë sjelljes agresive dhe kërcënuese të Serbisë” thuhet në komunikatë.
Ndërsa sekretari britanik theksoi qëndrimin e Britanisë së Madhe në mbështetje ndaj Kosovës.
“Unë jam këtu për të përforcuar faktin që ne ju mbështesim juve. Duam që të ju ndihmojmë në rrafshin e sigurisë, atë të zhvillimit ekonomik, të qeverisjes dhe në të gjitha çështjet me të cilat përballeni. Kemi qenë mbështetës afatgjatë të Kosovës dhe do të vazhdojmë të jemi të tillë” tha ai në fillim të takimit, thuhet nga Qeveria.
Cameron ka arritur të mërkurën në mbrëmje në Prishtinë, ndërsa të enjten do të ketë takim me presidenten Osmani dhe me ministren e Jashtme, Donika Gërvalla ku pas takimit do të ketë edhe një konferencë për media./teve1.info/
