Tre bomba të pashpërthyera nga Lufta e Dytë Botërore u çaktivizuan me sukses të mërkurën në qytetin gjerman të Këlnit nga ekipet e specializuara.
Sipas Bashkisë Metropolitane të Këlnit, rreth 20,000 banorë në lagjen Deutz, brenda një zone prej një kilometri katror, u evakuuan si masë sigurie gjatë operacionit për çaktivizimin e bombave, të cilat ishin prodhuar në Shtetet e Bashkuara.
Ky operacion përfaqëson një nga evakuimet më të mëdha që nga fundi i Luftës së Dytë Botërore. Gjatë ndërhyrjes, u mbyllën urat mbi lumin Rain, u pezulluan shërbimet e trenave dhe u evakuuan 58 objekte, përfshirë banesa, hotele, muze, shkolla, spitale, azile dhe qendra kujdesi, raporton Anadoly.
Pas përfundimit me sukses të çaktivizimit, rrugët dhe urat e mbyllura u hapën sërish dhe shërbimi i tramvajit filloi të funksionojë gradualisht.
Në Gjermani ende ndodhen shumë bomba të pashpërthyera nga Lufta e Dytë Botërore, disa prej të cilave ndodhen në zona të banuara. Ekspertët e trajtojnë çaktivizimin e tyre me kujdes dhe në mënyrë të kontrolluar.
