Eugen Cakolli nga KDI, E, ka deklaruar se e vetmja palë e autorizuar për ta kontestuar drejtpërdrejt vendimin e Kuvendit për zgjedhjen e Presidentes është një grup prej së paku dhjetë deputetësh.
Sipas Cakollit, kërkesa për kontestimin e vendimit duhet të parashtrohet brenda tetë ditësh nga miratimi i tij. Në të kundërtën, kjo rrugë e kontestimit mbyllet.
“E vetmja palë e autorizuar për ta kontestuar drejtpërdrejt vendimin e Kuvendit për zgjedhjen e Presidentes mbrëmë, janë së paku dhjetë deputetë, të cilët duhet ta parashtrojnë kërkesën brenda tetë ditësh nga miratimi i vendimit. Nëse brenda këtij afati nuk parashtrohet kërkesë, kjo rrugë e kontestimit mbyllet”, ka thënë Cakolli.
Ai ka theksuar gjithashtu se dërgimi i një “njoftimi” në Gjykatën Kushtetuese nuk prodhon, në vetvete, efekt pezullues ndaj zgjedhjes së Presidentes.
“Edhe nëse pretendohet që Kuvendi ka shkelur aktgjykimin, duhet të përcaktohet nëse është përmbushur kushti për shpërndarjen e Kuvendit”, ka deklaruar ai.
Cakolli ka sqaruar se Gjykata Kushtetuese mund ta mbikëqyrë zbatimin e aktgjykimit të saj, por kjo kompetencë nuk nënkupton automatikisht se Gjykata mund ta anulojë një vendim të ri të Kuvendit duke anashkaluar kushtet e përcaktuara në nenin 113, paragrafi 5 të Kushtetutës.
“Gjykata mund ta mbikëqyrë zbatimin e aktgjykimit të vet. Por kjo kompetencë opsionale nuk përbën, vetvetiu, rrethanë të sigurt që Gjykata merr autorizim për ta anuluar një vendim të ri të Kuvendit duke anashkaluar kushtet e nenit 113.5”, ka përfunduar Cakolli.
