Eugen Cakolli nga KDI ka analizuar procedurën që duhet të ndiqet për Projektligjin për ndryshimin e Ligjit për Dhomat e Specializuara, pas opinionit të dhënë mbrëmë nga Qeveria.
Sipas Cakollit, me dhënien e opinionit, shqyrtimi i projektligjit mund të vazhdojë në Kuvend, por koha e mbetur deri më 6 tetor, kur përfundon afati për çështjen e Presidentit, e vështirëson përmbylljen e procedurës brenda afateve të përcaktuara me Rregulloren e Kuvendit.
Cakolli ka bërë të ditur se materialet e plota të projektligjit u janë shpërndarë deputetëve sot, më 3 tetor.
Sipas tij, Komisioni për Legjislacion mund ta shqyrtojë projektligjin në parim, ndërsa më pas çështja duhet të kalojë në seancë plenare. Për procedurën e përshpejtuar, sipas tij, ekzistojnë edhe afate minimale që duhet të respektohen.
“Duhet të kalojnë së paku 48 orë nga shpërndarja e materialeve deri te shqyrtimi i parë dhe pastaj së paku 72 orë nga miratimi në parim deri te shqyrtimi i dytë. Pra, gjithsej së paku pesë ditë”, ka shkruar Cakolli.
Ai ka vlerësuar se, nëse Komisioni për Legjislacion e miraton projektligjin, shqyrtimi i parë në Kuvend mund të bëhet më së herëti më 5 tetor, ndërsa shqyrtimi i dytë dhe miratimi përfundimtar, duke respektuar afatin prej 72 orësh, më së herëti më 8 tetor.
Cakolli ka theksuar gjithashtu se edhe pas miratimit në Kuvend, ligji duhet të kalojë në procedurat e shpalljes dhe publikimit, ndërsa mund të kontestohet edhe në Gjykatën Kushtetuese.
Sipas tij, së paku 10 deputetë mund ta kontestojnë ligjin brenda tetë ditësh nga miratimi, qoftë për përmbajtjen, qoftë për procedurën e ndjekur./teve1.info/
