Analisti politik Ardian Bytyqi ka komentuar zhvillimet e fundit politike në vend, duke u ndalur te situata rreth zgjedhjes së presidentit, për të cilën ende nuk ka ndonjë lëvizje konkrete nga partitë politike.
Në emisionin “Info Nata” në Tëvë1, Bytyqi tha se afati po i afrohet fundit, ndërsa skena politike vazhdon të mbetet e paqartë.
Sipas tij, në vend të një zgjidhjeje, partitë opozitare kanë nisur të përplasen mes vete.
“Kanë kaluar rreth 105 apo 106 ditë nga 28 dhjetori dhe ne ende nuk jemi afër një zgjidhjeje, madje nuk dihet se kush do të jetë president i vendit. Sa më shumë që po i afrohemi afatit, partitë opozitare po fillojnë të sulmojnë njëra-tjetrën”, ka thënë Bytyqi.
Ai përmendi edhe përplasjet e fundit brenda opozitës, duke theksuar se këto zhvillime po e vështirësojnë edhe më shumë arritjen e një marrëveshjeje.
“Kemi parë edhe rastet e fundit të përplasjeve mes liderëve opozitarë, gjë që tregon fragmentimin e tyre në këtë fazë të rëndësishme”, u shpreh ai.
Bytyqi kritikoi edhe presidenten Vjosa Osmani, për të cilën tha se po qëndron e heshtur në këtë situatë.
“Ajo që më bën më shumë përshtypje është fakti që akteri kryesor në këtë proces, Vjosa Osmani, nuk ka asnjë qëndrim publik. Duket se po vazhdon me qasjen e saj të mëhershme, pa dhënë sinjale të qarta në këtë fazë”, ka deklaruar Bytyqi.
Ai shtoi se zhvillimet e ardhshme mund të sjellin skenarë të rinj politikë, ashtu siç ka ndodhur edhe në të kaluarën.
“Në këtë situatë, besoj se pranvera mund të sjellë një skenar tjetër politik, siç kemi parë edhe herë të tjera”, përfundoi Bytyqi.
