Njohësi i marrëdhënieve ndërkombëtare, Seb Bytyqi, ka vlerësuar se ndërtimi i dy urave në veri dhe jug të Kosovës mund të sjellë tensione mes Prishtinës dhe Beogradit, për shkak të ndjeshmërisë së lartë politike dhe ndëretnike në këtë zonë.
Në emisionin “Ditari” në Tëvë1, Bytyqi theksoi se projekti është kompleks dhe zbatimi i tij nuk është i menjëhershëm.
“Ndërtimi i këtyre dy urave mund të shkaktojë tensione në mes dy vendeve, duke pasur parasysh që nuk ndërtohen brenda një dite dhe për shkak të kompleksitetit që kanë si projekte ndërtimore”, u shpreh ai.
Bytyqi komentoi edhe reagimin e Ambasadës Gjermane në mbështetje të Kosovës, duke e cilësuar atë si një sinjal pozitiv, megjithatë ai tha se mbetet për t’u parë nëse do të ketë ndryshim real në qasjen e Bashkimit Evropian dhe vendeve anëtare.
“Ky reagim i Gjermanisë është sinjal që ajo është krah i Kosovës, por mbetet të shihet nëse kjo do të shndërrohet në ndryshim konkret në qëndrimin e BE-së dhe shteteve anëtare”, tha ai.
Sipas Bytyqit, gjithashtu ekzistojnë dyshime se ndërtimi i urave po bëhet edhe për qëllime elektorale.
