Opinionisti politik, Muhamet Bytyçi, ka vlerësuar se kryeministri i Kosovës dhe njëherësh kryetari i Lëvizjes Vetëvendosje, Albin Kurti, ndjek një qasje politike që, sipas tij, prodhon vazhdimisht tension dhe situata krize.
Në emisionin “Ditari” në Tëvë1, Bytyçi ka theksuar se Kurti synon të ruajë profilin e një udhëheqësi që është vazhdimisht në betejë politike, si në aspektin e jashtëm ashtu edhe brenda partisë së tij.
“Ne nuk mund ta dimë se cili do të jetë rezultati, por ajo që dimë është se Kurti ka një profil politik që tenton të prodhojë vazhdimisht kriza, si në aspektin e jashtëm, pra në qeverisje dhe ushtrim të pushtetit, ashtu edhe në atë të brendshëm, duke e mbajtur partinë e tij në një tension të vazhdueshëm zgjedhor. Kjo sepse ai synon të ruajë imazhin e një udhëheqësi që është gjithmonë në betejë politike, ndërkohë që Kosovës i duhet diçka krejt tjetër”, ka deklaruar Bytyçi.
Ai ka shtuar se Kosovës i nevojitet një qasje tjetër, e fokusuar në stabilitet, fuqizim institucional dhe integrim më të madh ndërkombëtar, sidomos në një kontekst të ri global.
Në vijim, Bytyçi është shprehur se për të ndryshuar situatën politike dhe ekonomike në vend, është i domosdoshëm një ripozicionim i tri blloqeve kryesore politike: LDK-së, PDK-së dhe Lëvizjes Vetëvendosje.
Sipas tij, arritja e shumicës prej 51 për qind është tashmë e vështirë, megjithëse kjo, siç tha ai, varet edhe nga përgatitja e opozitës dhe zhvillimet politike në javët në vijim.
Bytyçi gjithashtu theksoi se përfshirja aktive në politikë e presidentes Vjosa Osmani mund të ndikojë në riformatimin e skenës politike në vend.
“Nëse dëshirojnë të ndryshojnë situatën politike dhe ekonomike në vend, atëherë nevojitet një ripozicionim i tri blloqeve politike: e djathta e prirë nga LDK-ja, qendra e djathtë nga PDK-ja dhe aleatët e saj tradicionalë, si dhe Lëvizja Vetëvendosje, e cila konsiderohet e majtë, ndonëse politikat e saj publike deri më tani kanë qenë të përziera dhe shpesh kanë anuar nga e djathta. Përfshirja aktive e presidentes Vjosa Osmani në jetën politike mund të sjellë rezultate interesante që do ta riformësonin skenën politike, sepse 51 për qindëshi i famshëm është tashmë i paarritshëm. Megjithatë, kjo varet edhe nga përgatitja e opozitës dhe nga zhvillimet që priten në 40 deri në 50 ditët e ardhshme”, ka përfunduar ai./teve1.info/
