I mbyllur u zhvillua i gjithë gjykimi.
Në kushte të tilla, Zhivojin Nesiq u përballë me akuzat e Prokurorisë Speciale për krime lufte, për më pak se një vit.
Ai akuzohej për dhunim seksual të një viktime gjatë luftës së fundit në Kosovë.
Në ditën kur u bë shpallja e verdiktit të Gjykatës, nuk u paraqit vet i akuzuari.
E atë, Gjykata e shpalli fajtor për krime lufte, duke e dënuar me dënimin maksimal që mundëson ligji i ish Jugosllavisë.
“Të pandehurit i shqipton dënim në kohëzgjatje prej 15 vitesh. Dënim në të cilin do të llogaritet edhe koha e kaluar në paraburgim”, tha Violeta Namani- Hajra, kryetar e Trupit Gjykues.
Në arsyetimin e shkurt të aktgjykimit, kryetarja e trupit gjykues, potencoi se përgjatë gjykimit u vërtueta se Nesiq kishte dhunuar seksualisht një grua shqiptare, përmes dëshmisë së vet viktimës dhe disa dëshmitarëve.
“Dëshmitë e të dëmtuarës gjejnë mbështetje në dëshmitë e dëshmitarëve okularë A.A., H.A., dhe H.H., ku nga këto dëshmi, Gjykata ka vërtetuar se Zhivojin Nesiq me përdorimin e dhunës fizike dhe psiqike dhe veprimeve çnjerëzore, ka kryer dhunim seksual ndaj femrës së nacionalitetit shqiptar”, tha ajo..
Për Prokurorinë Speciale, ky rast u vlerësua si sukses.
“Kjo është një ofrim i drejtësisë për të gjitha viktimat e dhunës seksuale dhe të cilat e kanë të vetmën shpresë, ku gjegjësisht e realizuan një të drejtë të vetën. Prokuroria Speciale, siç e dini ka zhvilluar të gjitha seancat të këtij gjykimi ka qenë me dyer të mbyllura, për shkak të ndjeshmërisë së rastit, duke ruajtuar kredibilitetin e viktimave. Për çdo person që ka njohuri, ju bëjmë thirrje ne si prokurori, si dëshmitarë apo si viktima të krimeve të luftës, të paraqiten qoftë në polici apo prokurorim në mënyrë që edhe ne të mund të ngrisim aktakuza”, u tha nga Prokuroria.
Vendimi i shkallës së parë, u mirëprit edhe nga Qendra Kosovare për Rehabilitimin e të Mbijetuarve të Torturës.
“Është një vendim i mirëpritur, edhe nga ne si organizatë, por veçanërisht nga e mbijetuara e dhunës seksuale, të cilës tani sapo ia komunikova lajmin, e cila e priti mjaft me emocion, që është për momentin bashkë me ekipën psikosociale të organizatës sonë, të cilët e kemi mbështetë që nga fillimi. Ky vendim i Gjykatë sot, sigurisht është një satifaksion për viktimën, që të paktën iu shqiptua një dënim prej 15 vitesh, të akuzuarit Zhivojin Nesiç, ku presim që edhe për rastet e tjera të ketë drejtësi”, tha Fatmire Haliti nga QKRMT.
Palët në këtë rast, kanë të drejtë ankesë brenda 30 ditësh.
