Ulëset e tyre janë të zbrazura.
Jeton dhe Nexhat Vllasaliu, të mërkurën vendosën të mos paraqiten në Gjykatë.
Vëllezërit Vllasaliu, munguan në shpalljen e aktgjykimit të tyre për vrasje të rëndë dhe dëmtim të kufomës së Bedri Rexhepit.
E familjarët e Rexhepit, sikurse përgjatë gjithë gjykimit, ishin të pranishëm në numër të konsiderueshëm, për të kuptuar vendimin e Gjykatës për vrasjen e familjarit të tyre.
“Të akuzuarit Jeton dhe Nexhat Vllasaliu janë fajtor për shkak të veprave penale kryerje dhe bashkëkryerje për veprën penale vrasje e rëndë, si dhe veprën penale dëmtim i varreve apo kufomave” , tha Media Bytyqu – kryetare e Trupit Gjykues.
Gjykata Themelore në Prishtinë, vendosi që vëllezërit Vllasaliu të lihen në burg deri në fund të jetës së tyre. Kjo u mirëprit nga familjarët.
“Të akuzuarit i gjykon më dënim burgim të përjetshëm”, ishte vendimi që lexoi Bytyqi që u duartrokit në sallë.
Jeton dhe Nexhat Vllasaliu, u dënuan për aktakuzën e cila thotë se këta të dy, nga 9 janari deri më 8 prill 2021, kishin planifikuar vrasjen e Bedri Rexhepit, me qëllim të dobisë pasurore.
“Pas një procesi të gjatë, natyrisht të dhimbshëm për familjen e dëmtuar, një proces i cili u shoqërua me shumë sfida e përpjekje për të ardhur tek drejtësia, sot familja e dëmtuar mori së paku një satisfaksion moral për dënimin që iu shqiptua atyre që bën gjithçka për ta mbuluar një krim. Sot drejtësia foli, sot plagët janë më të lehta. Ndërkaq dënimi i shqiptuar është dënimi i pritur, për të cilin kemi punuar”, tha Besnik Berisha, avokat i familjes Rexhepi.
E burgimi i përjetshëm, u konsiderua si dënim i lartë nga mbrojtja e Nexhat Vllasaliu.
“U mor një vendim i rëndë, burg i përjetshëm. Gjatë shqyrtimit kryesor ne kemi cek gjitha të metat të cilat i ka pasur aktakuza, fatkeqësisht ato nuk janë përfillur. Mirëpo, ky nuk është vendim përfundimtar, por vendim i shkallës së parë dhe do të shohim në të ardhmen se si do të rrjedhin gjërat”, tha Shemsedin Piraj, avokat i Nexhat Vllasaliut.
Brenda tridhjetë ditësh, palët kanë të drejtë ankese në Gjykatën e Apelit.
