Kandidati për kryetar të Podujevës nga radhët e Lëvizjes Vetëvendosje, Shpejtim Bulliqi, ka komentuar një deklaratë të tij të mëhershme që ngjalli debat gjatë përballjes me kandidatin e LDK-së për këtë komunë, Ekrem Hyseni, ku gjatë një emisioni të mëparshëm, Bulliqi i kishte kërkuar Hysenit që të dëshmonte përmes një fotografie se vëllai i tij është invalid lufte.
Të martën, në emisionin “Këndi i Debatit” në Tëvë1, Bulliqi ka sqaruar qëndrimin e tij, duke theksuar se fjalët i janë keqinterpretuar dhe se qëllimi i tij ka qenë të bëjë dallimin mes viktimës civile dhe invalidit të luftës, pra mes statusit të veteranit dhe viktimës civile.
Sipas tij, kjo deklaratë u interpretua nga Hyseni si mosrespekt ndaj viktimës dhe u përdor për viktimizim politik.
“Ky tentonte që vëllain e tij ta paraqiste si invalid të Ushtrisë Çlirimtare të Kosovës (UÇK). Ne në Koliq kemi shumë viktima dhe më vjen keq për humbjet që kanë ndodhur, por ato janë viktima civile. Dallon viktima civile nga ajo e një ushtari të UÇK-së”, ka deklaruar Bulliqi.
Ai ka shtuar se Hyseni, sipas tij, kishte tendencë ta paraqiste vëllain e tij si veteran lufte, gjë që nuk përputhej me të vërtetën.
“Tendenca e tij ishte që ta paraqiste si veteran të luftës dhe unë i thashë se ai nuk është veteran i luftës, por viktimë civile, sikur shumë viktima të tjera. Ai e deformoi fjalën time dhe tentoi ta përdorë për qëllime politike, duke pretenduar se unë nuk e njoh apo e mohoj atë. Pra, konteksti i diskutimit ka qenë që të bëhet dallimi mes viktimës si veteran i luftës dhe viktimës civile, larg asaj që u tentua të paraqitet nga diskutimi im, sepse unë ndjej keqardhje për çdo humbje”, ka përfunduar Bulliqi./teve1.info/
