Ekipet izraelite filluan të martën shembjen me buldozer të selisë së agjencisë së OKB-së për refugjatët palestinezë në Jerusalem, duke vazhduar goditjen ndaj një organizate që ofron shërbime humanitare për miliona njerëz në të gjithë rajonin.
Ministri i Sigurisë Kombëtare, Itamar Ben-Gvir, tha në një deklaratë se kishte shoqëruar ekipet në selinë qendrore dhe e quajti atë një “ditë historike”.
Kreu i agjencisë së OKB-së për palestinezët e ka quajtur këtë “sfidim të qëllimshëm të ligjit ndërkombëtar”.
“Një nivel i ri i sfidimit të hapur dhe të qëllimshëm të ligjit ndërkombëtar, duke përfshirë privilegjet dhe imunitetet e Kombeve të Bashkuara, nga Shteti i Izraelit”, tha Philippe Lazzarini për sulmin e fundit izraelit në një postim në platformën amerikane të mediave sociale X.
“Herët këtë mëngjes, forcat izraelite sulmuan selinë e UNRWA-së, një vend i Kombeve të Bashkuara, në Jerusalemin Lindor. Buldozerët hynë në kompleks dhe filluan të shembnin ndërtesat brenda tij nën mbikëqyrjen e ligjvënësve dhe një anëtari të qeverisë.”
Ky veprim vjen pas një sërë veprimesh nga autoritetet izraelite që synojnë fshirjen e identitetit të refugjatit palestinez, tha ai, duke kujtuar se më 12 janar forcat izraelite bastisën gjithashtu një qendër shëndetësore të UNRWA-s në Jerusalemin Lindor dhe urdhëruan mbylljen e saj.
Autoritetet izraelite kanë njoftuar gjithashtu plane për të ndërprerë ujin dhe energjinë elektrike në objektet e UNRWA-s, duke përfshirë shkollat dhe qendrat shëndetësore, në javët e ardhshme, shtoi ai.
“Këto veprime, së bashku me sulmet e mëparshme me zjarrvënie dhe një fushatë dezinformimi në shkallë të gjerë, bien ndesh me vendimin e tetorit nga Gjykata Ndërkombëtare e Drejtësisë, e cila ritheksoi se Izraeli është i detyruar sipas ligjit ndërkombëtar të lehtësojë operacionet e UNRWA-së, jo t’i pengojë ose parandalojë ato”, tha Lazzarini , duke i kujtuar Izraelit se “nuk ka juridiksion mbi Jerusalemin Lindor”.
UNRWA ofron ndihmë dhe shërbime për rreth 2.5 milionë refugjatë palestinezë në Gaza, Bregun Perëndimor të pushtuar dhe Jerusalemin lindor, si dhe për 3 milionë refugjatë të tjerë në Siri, Jordani dhe Liban.
