Ish-komandanti i KFOR-it Erhard Buhler, ka thënë se Kosova është e sigurt pasi e ka praninë e Aleancës Veri-Atlantike dhe mbështetjen e plotë të SHBA-së dhe Gjermanisë.
“Kosova nuk është në NATO, por ka mbështetje të plotë të SHBA-së, Gjermanisë dhe tërë Aleancës Veri-Atlantike, prandaj kosovarët nuk duhet të merakosen shumë në lidhje me këtë çështje, tani pas agresionit të Rusisë ndaj Ukrainës”, ka thënë ai në një intervistë në RTK.
Buhler ka shtuar se duhet qenë të gjithë të shqetësuar sepse Evropa ka hyrë në një fazë të jo stabilitetit. Sipas tij, NATO po bën shumë në lidhje me luftën në Ukrainë si në aspektin politik dhe atë ushtarak.
Në rrafshin politik, gjenerali Buhler tha se të gjitha shtetet janë të bashkuara duke i dhënë ndihmë Ukrainës, kurse në atë ushtarake, që nga viti 2014, Aleanca ka vazhduar ta mbështesë ushtrinë e këtij vendi.
Sa për anëtarësimin e Kosovës në NATO, gjenerali Buhler deklaroi se është në interes të BE-së dhe vetë NATO-s që këto vende të integrohen pasi Ballkani Perëndimor ndodhet në zemër të Evropës.
