BSPK-ja ka njoftuar se do t’i përkrah kërkesat e sindikalistëve në KEK, të cilat u dëgjuan në protestën e sotme e cila u mbajt në Prishtinë para KEK-ut dhe Qeverisë.
“Besojmë shumë dhe presim që kërkesat e drejta dhe të arsyeshme të punëtorëve të Departamentit të Sigurimit Fizik në KEK të shqyrtohen dhe punëtorëve t’u jepet mbështetja e duhur institucionale duke i realizuar kërkesat e tyre të drejta dhe të arsyeshme”, thuhet në njoftimin e BSPK-së.
Punëtorët e shërbimit të sigurimit fizik të Korporatës Energjetike të Kosovës (KEK), u mblodhën sot në marshin protestues të organizuar nga sindikata “Mbrojtja dhe siguria” ku kërkesat kryesore të tyre ishin respektimi i të drejtave të garantuara me ligj për këta punëtorë, dhe kthimin e Departamentit të sigurisë fizike në KEK.
Ata protestuan me pankarta me mbishkrimet: “Ne jemi të huazuar dhe jo të privatizuar”, “Nuk lejojmë të shitemi tutje”, “Ne duam të kthehemi”, “KEK-u ka interes”, “Pse nuk jemi aty?”.
