Nuk është hera e parë që vjen në gjykatore. Nexhmedin Pepaj, kësaj radhe gjatë dëshmisë së tij u përball me njërin prej të akuzuarve.
Në seancën për krime lufte në Dubravë, ku të akuzuar janë Zharko Zariq dhe Momir Pantiq, ky i fundit pati pyetje për dëshmitarin.
Ai e vuri në dyshim identifikimin që ia bëri Pepaj.
“O zotëri, ty t’kom njoftë. Edhe ti je ai që je përgjegjës për gjithë ato që na u kanë bo. Ti me gjithë atë të akuzuarin afër që e ke. Edhe me shumë tjerë. Edhe me vëllanë e Zharko Zariqit. I cili u thojke motrave e nanave tona kur na tërhiqnin zvarrë, ju rrini me mue. Kjo ishte më e rënda”, ka thënë Pepaj.
Ai shpjegoi se Pantiqin e kishte njohur qysh në fëmijëri pasi kishte familjarë që jetonin afër tij.
Gjatë kohës së luftës, dëshmtari tha se e ka parë atë duke udhëhequr policët serbë për të kryer krime.
“Në vitet 97 98 99, po ky komandant ka sjellë në fshatin tonë diku 30 zyrtarë policorë të stacionit të Istogut. Aty kanë fillu maltretimet” , shtoj Pepaj.
Një prej krimeve që i ndodhi familjes së tij, dëshmitari e tregoi para trupit gjykues.
“Dolën prej veture të dytë, e kanë rrahë aq shumë sa e sollën në prag të vdekjes. Dhe ju lutem, prokurori e gjykatë, nëse ka mundësi, ta pytni këtu para meje se as sot nuk e di, çka ju bani vëllau jem që e prunën në atë gjendje”, ka thënë tutje Pepaj.
Ai e tregoi edhe një fragment nga momenti kur e kishin nxjerrë nga shtëpia e tij policët serbë.
“Ai është djali jem. Britmat e tij ende i kam në kokën time kur e ka pa prindin tu e nxjerrë zvarrë prej shpije. Katër vjet i ka pas, e man mend edhe sot”, ka përfunduar Pepaj.
Përkundër dëshmisë së Pepaj, avokati i Pantiq, kërkoi të dinte nëse dëshmitari kishte njohuri për ndihmesën që Pantiq, supozohet t’ua ketë dhënë shqiptarëve për të shpëtuar.
“A jeni në dijeni se i ka ndihmu e i ka shpëtu popullatës civile?”, ka thënë Deleviq.
“Pse s’ma shpëtoi vëlluan, që ma vranë? Ma vranë para syve të babës? Jo që e vranë, por e prenë në fyt, si kafshë”, shtoj Pepaj.
Gjykimi ndaj Pantiq dhe Zariq, do të vazhdojë në muajin gusht.
Dyshja akuzohet se janë përgjegjës për vrasjen e tre shqiptarëve të burgosur në Dubravë, dhe për dhunën sistematike ndaj të burgosurve të tjerë në maj të vitit 1999.
