Shtatë anëtarë të një grupi “Rrjeti Krasniqi” të njohur për falsifikimin e dokumenteve, i cili ndihmonte migrantët ilegalë të udhëtonin nëpër Evropë, janë arrestuar pas përpjekjeve të shumta të Mbretërisë së Bashkuar dhe Kosovës për të ndërprerë veprimtarinë e tyre.
Rrjeti Krasniqi, me bazë në Ballkanin Perëndimor, drejtonte një operacion të sofistikuar falsifikimi, duke prodhuar dokumente identiteti, pasaporta dhe patentë-shoferë të falsifikuar.
Këto dokumente u mundësonin migrantëve ilegalë dhe trafikantëve të njerëzve të pretendonin rrejshëm shtetësinë e më shumë se 50 vendeve, përfshirë Mbretërinë e Bashkuar.
Sipas Frontex (Agjencia Evropiane e Rojës Kufitare dhe Bregdetare) autoritetet kosovare kanë vlerësuar se ka shumë gjasa që sanksionet britanike të kenë pasur ndikim të rëndësishëm në vendimin e disa anëtarëve të grupit për t’u dorëzuar në Policinë e Kosovës.
Të gjithë të dyshuarit ishin shpallur në kërkim me urdhërarreste kombëtare dhe ndërkombëtare, por disa prej atyre që u dorëzuan e bënë këtë vetëm pasi u sanksionuan nga Mbretëria e Bashkuar.
Sipas tyre, ministri britanik për Evropën, Stewart Wood, tha se puna e Mbretërisë së Bashkuar me Kosovën për t’i goditur ata është një shembull se si ky partneritet e bënë më të fortë brenda vendit.
Ndërsa, Blerim Isufaj, Kryeprokuror i Prokurorisë Speciale të Kosovës kishte thënë se kjo arritje nxjerr në pah rëndësinë e bashkëpunimit të fuqishëm ndërkombëtar dhe të përpjekjeve të përbashkëta ndërmjet Prokurorisë Speciale të Republikës së Kosovës dhe autoriteteve të Mbretërisë së Bashkuar, në luftimin me sukses të krimit të organizuar të migracionit dhe në forcimin e sundimit të ligjit.
Të dhënat e Frontex tregojnë një rënie prej 87 për qind të zbulimeve të kalimeve të parregullta kufitare në vitin 2025 krahasuar me vitin 2023.
