Brighton dhe Manchester City ndajnë nga një pikë falë barazimit 1-1 në sfidën e prapambetur të Premier League, që nuk kishte aspak rëndësi në objektivat dhe renditjen e dy skuadrave.
Me Manchester Cityn që ka siguruar titullin kampion dhe Brightonin që ka siguruar pjesëmarrjen në Europa League për herë të parë në histori, rezultati ishte i fundit që kishte rëndësi në këtë takim.
Megjithatë në “Amex Stadium” u zhvillua një 90-minutësh mjaft i bukur, mes dy prej skuadrave që gjatë gjithë sezonit na kanë mësuar me paraqitjet e tyre spektakolare.
Të parët në avantazh kaluan “citizens” me anë të Phil Foden në minutën e 25-të, ndërsa më pas reagoi mjaft mirë skuadra e De Zerbit, që shënoi tre gola deri në fund të pjesës së parë.
Megjithatë dy prej tyre u anuluan nga VAR-i dhe mbeti në fuqi vetëm ai i Enciso në minutën e 38’, që vulosi edhe barazimit, ndërsa deri në fund rezultati nuk ndryshoi, pavarësisht rasteve të shumta të të dy skuadrave.
