Një shtëpi në fshatin Makoc të kryeqytetit ishte cak i plumbave mbrëmjen e së hënës.
Madje sipas raportit të Policisë, disa predha kishin depërtuar edhe brenda.
E në vendin e ngjarjes i gjetën edhe gëzhojat.
“Është raportuar se dy persona të panjohur kanë hyrë në oborrin e ankuesit mashkull kosovar dhe kanë shtënë me armë zjarri në drejtim të shtëpisë, ku disa predha kishin depërtuar brenda dhe kishin dëmtuar disa mobile shtëpiake. Në vendin e ngjarjes janë gjetur dhe sekuestruar 27 gëzhoja”, ka njoftuar policia e Kosovës.
Televizioni e gjeti shtëpinë e ankuesit B.K nga ky fshat.
Madje rrugës për atje, u panë edhe forca të shtuara të Policisë së Kosovës lëvizëse dhe statike duke kontrolluar vetura.
Por B.K nuk pranoi të deklarohet para kamere.
I njëjti as nuk tregoi nëse ka pasur problem me dikë.
Jashtë kamerës folën edhe dëshmitarët që janë edhe banorë përrreth.
Të njëjtit i thanë televizionit se vetëm kanë dëgjuar të shtëna të shumta, pa i parë njerëzit, por që sipas tyre lagjja është e gjitha me kamera dhe Policia e Kosovës tashmë i ka.
