Guvernatori i Bankës Qendrore të Republikës së Kosovës, Ahmet Ismaili ka zhvilluar takim me zëvendëspresidenten e Banka Botërore, Antonella Bassani, në kuadër të Takimeve Pranverore 2026 në Washington DC.
Sipas një njoftimi, në këtë takim u diskutuan zhvillimet në sektorin financiar të Kosovës, me theks të veçantë në modernizimin e sistemit të pagesave dhe integrimin rajonal në Ballkanin Perëndimor.
Guvernatori Ismaili theksoi përkushtimin e BQK-së për avancimin e infrastrukturës së pagesave dhe përshpejtimin e integrimit në Zonën Unike të Pagesave në Euro (SEPA), duke e cilësuar këtë proces si prioritet strategjik për zhvillimin ekonomik të vendit.
Gjatë takimit u trajtuan edhe zhvillimet lidhur me sistemin e pagesave të shpejta përmes zgjidhjes TIPS Clone të Bankës së Italisë, si dhe hapat për zgjerimin e shërbimeve shtesë. Po ashtu, u theksua rëndësia e zbatimit të financimit të projektit të sapo ratifikuar të sektorit financiar dhe avancimi i kuadrit rregullativ për sigurimin e depozitave, me synim rritjen e mbulueshmërisë dhe forcimin e stabilitetit financiar.
Nga ana e saj, Bassani rikonfirmoi gatishmërinë e Bankës Botërore për të mbështetur BQK-në dhe reformat e ndërmarra, duke vlerësuar arritjet e deritanishme.
Në fund, palët diskutuan edhe thellimin e bashkëpunimit ndërmjet BQK-së dhe Grupit të Bankës Botërore, me fokus në zhvillimin e sektorit financiar dhe forcimin e kapaciteteve institucionale.
