Hendbollistet e Kombëtares së Kosovës kanë udhëtuar për në Karlskrona, ku të enjten prej orës 19:00 është ndeshja me Suedinë. Ndeshja Suedi – Kosovë i takon fazës së dytë kualifikuese për Botërorin 2025. Prej të hënës Kombëtarja ka stërvitur në qytetin tjetër suedez, Eslov.
Selektori i Kosovës Agron Shabani është shprehur i kënaqur me punën e bërë, por pranon forcën e Suedisë, që është Kombëtarja bindshëm më cilësore në fazën e dytë kualifikuese.
“Suedia është Kombëtare me histori të pasur dhe performancë të qëndrueshme në arenën ndërkombëtare. Ekipi i drejtuar nga Tomas Axner përbëhet nga një kombinim i lojtareve me përvojë dhe talenteve të reja. Në mesin e tyre janë disa lojtare që luajnë në ekipe me renome të Evropës. Suedia vazhdon të jetë forcë e rëndësishme në hendbollin ndërkombëtar. Prandaj, duke marrë parasysh përvojën dhe sukseset e fundit të Suedisë, mundësitë tona janë të kufizuara, edhe pse kemi bërë përparim të dukshëm në vitet e fundit duke arritur suksese të rëndësishme në arenën ndërkombëtare”, ka thënë Shabani për faqen zyrtare të Federatës së Hendbollit të Kosovës.
Ai ka folur edhe për ndryshimet në ekip.
“Në nëntor e siguruam vendin e parë në grup në fazën e parë kualifikuese duke mposhtur Belgjikën dhe Bosnjë-Hercegovinën. Për momentin kemi ekip komplet të ri, në krahasim me grumbullimin e kaluar. Kemi mungesën e tri lojtareve, Leonora Demajt, Marigona Hajdarit dhe Arlinda Hajdarit. Për shkak të lëndimit dhe obligimeve personale nuk i kemi në dispozicion këtë moment. Është kthyer Mirela Gjikokaj dhe Merlinda Qorraj, që janë lojtare të elitës së Norvegjisë. Kemi ftuar edhe disa lojtare tjera, duke u mundaur të formojmë një ekip të ri me potencial të ri. Nuk do të jetë lehtë, duke marrë parasysh që do të kemi një ekip të ri në fushën e lojës, me disa stërvitje së bashku. Por shpresoj se vajzat do të japin maksimumin edhe pse jemi në një situatë të re”, ka vazhduar selektorit i Kosovës, Agron Shabani.
Ndeshja e kthimit është të dielën nga ora 17:15 në Pallatin e Rinisë dhe Sportit në Prishtinë.
