Anëtarët e Agjencisë Shtetërore të Hetimit dhe Mbrojtjes (SIPA), me urdhër të Gjykatës së Bosnjë e Hercegovinës kanë tentuar të arrestojnë kreun e entitetit Republika Srpska të Bosnjë e Hercegovinës, Milorad Dodik.
Megjithatë, siç konfirmoi për Anadolu zëdhënësja e SIPA-s, Jelena Miovçiq, Dodik nuk është arritur të arrestohet te Qendra Administrative e Qeverisë së Republikës Srpska në Sarajevën Lindore.
“Sonte, anëtarët e SIPA-s ishin në ambientet e Qendrës Administrative të Qeverisë së RS-së në Sarajevën Lindore dhe u përpoqën të zbatojnë urdhrin e Gjykatës së BeH-së, që ka të bëjë me heqjen e lirisë së Milorad Dodikut, presidentit të Republikës Srpska”, tha Miovçiq.
Ajo shtoi se anëtarët e SIPA-s “kryen një intervistë me anëtarë të Ministrisë së Punëve të Brendshme të Republikës Srpska”
“Ata janë tërhequr nga vendi i ngjarjes, sepse kanë vlerësuar se mund të ketë shkelje të rendit dhe qetësisë publike. Nuk ka pasur përdorim të forcës”, tha Miovçiq.
Kriza politike në Bosnjë e Hercegovinë pasoi pasi Gjykata e Bosnjë e Hercegovinës në fund të muajit shkurt dënoi presidentin e entitetit Republika Srpska, Milorad Dodik, me një vit burg dhe gjashtë vjet ndalim nga mbajtja e detyrës së presidentit të Republikës Srpska për “mosrespektim të vendimeve të Përfaqësuesit të Lartë në Bosnjë e Hercegovinë”.
Më pas, Zyra e Prokurorit të Bosnjë e Hercegovinës lëshoi një urdhër-arrest ndaj Dodikut, si dhe kryeministrit të Republikës Srpska, Radovan Vishkoviq dhe kreut të asamblesë së entitetit, Nenad Stevandiq.
Ata dyshohen për veprën penale të “sulmit ndaj rendit kushtetues” pasi Asambleja Kombëtare e Republikës Srpska e miratoi, ndërsa Dodik nënshkroi një dekret që shpall ligjet që ndalojnë funksionimin e institucioneve shtetërore gjyqësore dhe të sigurisë në entitetit Republika Srpska të Bosnjë e Hercegovinës.
Më herët, Gjykata e Bosnjë e Hercegovinës ka pranuar propozimin e Prokurorisë së Shtetit për lëshimin e një urdhër-arresti ndërkombëtar për Dodikun dhe Stevandiqin, të cilët akuzohen për veprën penale “sulm ndaj rendit kushtetues”. Interpoli nuk lëshoi një urdhër-arrest ndërkombëtar dhe Gjykata e Bosnjë e Hercegovinës kërkoi një rishikim të këtij vendimi.
Ndërkohë, Dodik disa herë ka kaluar kufirin e Bosnjë e Hercegovinës për të udhëtuar jashtë vendit.
