Gjykata e Bosnjë dhe Hercegovinës ka lëshuar një urdhër-arrest mbarëkombëtar për kreun e Republikës Sërpska, Millorad Dodik dhe dy të tjerë, pasi ai injoroi një urdhër arresti në nivel shtetëror javën e kaluar.
Dy të tjerët janë kryeministri i njësisë Radovan Vishkoviç dhe kryetari i Asamblesë Kombëtare, Nenad Stevandiç. Urdhri nënkupton që çdo oficer policie në vend që ndeshet me ndonjërin prej tyre duhet t’i arrestojë menjëherë.
Të gjithë ata akuzohen për sjellje antikushtetuese. Mediat boshnjake raportojnë se Stevandiq është larguar nga vendi për në Serbi gjatë fundjavës dhe në këtë kohë qëndron jashtë vendit.
Prokurorët e nivelit shtetëror të Bosnjës lëshuan urdhra arresti për treshen javën e kaluar , të cilat nuk janë zbatuar. Urdhri mbarëkombëtar del automatikisht nëse ata që kërkohen nga zyra e prokurorisë në nivel shtetëror nuk vijnë për t’u marrë në pyetje, siç është rasti me tre zyrtarët serbë të Bosnjës.
Dodik nuk ka komentuar ende urdhrin e ri, por ka postuar në X se Republika Srpska po ndërmerr hapa për të formuar policinë e saj kufitare. Është e paqartë nëse kjo polici e re kufitare – e cila do të vepronte përveç agjencisë së kontrollit kufitar në nivel shtetëror – do të vendoset përgjatë vijës administrative midis entiteteve, ka raportuar Euronews.
Pas rritjes së tensioneve të fundit në Bosnjë, forca paqeruajtëse ndërkombëtare e udhëhequr nga evropianët në Bosnje, EUFOR, ka thënë se po rrit numrin e trupave të saj.
