Kryeministri i Kosovës, Albin Kurti, tha se në takimin e sotëm të mbajtur në Bruksel me presidentin e Serbisë, Aleksandër Vuçiq, si dhe me ndërmjetësit si përfaqësuesi i Lartë i BE-së për Politikë të Jashtme të Sigurisë, Josep Borrell, e të dërguarin e BE-së për dialog, Mirosllav Lajçak, nuk ka pasur propozim nga ana e Beogradit.
Kurti, tha se dokument të shkruar me propozim konkret në tavolinën e takimit të lartë ka sjellë vetëm Republika e Kosovës, përmes tij.
“Së pari nuk ka propozim të Beogradit, ka dokument kushtëzues që kur ta lexoni do ta vërtetoni, nuk mund të ketë kompromis midis propozimit dhe kushtëzimit dhe e fundit, që është e para, sot dokument të shkruar me propozim konkret ka sjellë veç Republika e Kosovës përmes meje, as pala serbe as Bashkimi Evropian. Bashkimi Evropian ka lehtësuar dhe ka ndërmjetësuar”, tha Kurti gjatë konferencës për media nga Brukseli.
I pyetur nga ana e gazetarëve se a ka dalë me një propozim Bashkimi Evropian siç tha Borrell, Kurti tha se BE nuk bënë propozime, por kujdesen që propozimet e palëve të jenë në kornizat evropiane.
“Bashkimi Evropian është aty për të siguruar që propozimet e palëve janë përbrenda frymës dhe formës së Bashkimit Evropian, Evropës, pra ata nuk bëjnë propozime ata kujdesen që propozimet e palëve janë të tilla që nuk tejkalojnë kornizat evropiane. E tash, pala serbe nuk ka sjellë propozim, por e kishte dërguar një kushtëzim te Bashkimi Evropian, dhe midis kushtëzimit dhe propozimit nuk mund të ketë mesatare aretmitikore , por dokument të shkruar nga ana e tyre nuk ka pasur”, tha kryeministri i vendit, raporton teve1.info
Tutje, Kurti është deklaruar se ka propozuar një udhërrëfyes të sekuencuar për zbatimin e marrëveshjes së Ohrit dhe atë të Brukselit.
Kryeministri i vendit tha se takimi nuk kishte sukses sepse siç tha ai, nuk mund të ketë kompromis mes një propozimi me sekuencë dhe një kushtëzimi të vjetër nga Serbia, siç është ai për formimin e Asociacionit të Komunave me Shumicë Serbe.
“Në këtë takim të nivelit të lartë, unë kam propozuar një udhërrëfyes të sekuencuar për zbatimin e Marrëveshjes së Brukselit të 27 shkurtit dhe të Aneksit të zbatimit të Ohrit të 18 marsit. Këtë propozim këtë sekuencë se si duhet të jenë hapat për të zbatuar marrëveshjen bazike për të cilën jemi dakorduar unë mund të ua shpërndaj të gjithë juve në fund të kësaj konferenca për media. Pala tjetër pra presidenti i Serbisë nuk ka dhënë asnjë propozim dhe takimi nuk ka pasur një rezultat. Nuk ka mundur të ketë kompromis, meqenëse nuk mund të ketë kompromis midis propozimit me sekuencë dhe kushtëzimit të vjetër”, tha Kurti gjatë konferencës për media drejtpërdrejt nga Brukseli.
Pas takimit trepalësh, përfaqësuesi i lartë i BE-së, Josep Borrell, tha se kryeministri i Kosovës, Albin Kurti nuk e ka pranuar propozimin e BE-së për kompromis dhe se ka insistuar në njohje de- facto, kur Vuçiq po.
“Ne kemi propozuar të zbatohen këto paralelisht, të sigurohet që të marrë diçka e të japë diçka. BE-ja dhe komuniteti i gjerë ndërkombëtarë, përfshirë partnerët amerikanë, e shohin këtë si rrugë të vetme për të funksionuar zbatimi. Dyja duhet të kenë garanci se veprimet shpërblehen, me masa nga pala tjetër. Sot, jam munduar me Kurtin e Vuçiqin të gjej rrugën para, duke u bazuar në propozimin tonë. Për fat të keq, pas takimit të gjatë, Kurti nuk ishte i gatshëm që të ecët para, të fillojë një proces kredibil për themelimin e Asociacionit. Ai insistoi të formalizohet njohja de facto si hap i parë”, ka thënë Borrell.
Presidenti i Serbisë, Aleksandar Vuçiq, tha se bisedimet me kryeministrin e Kosovës, përfunduan pa sukses “në kuptimin e gjetjes së një rruge të qartë drejt normalizimit të marrëdhënieve”./teve1.info/
Kurti: Propozova udhërrëfyes për zbatimin e marrëveshjes, Vuçiq kushtëzoi
Kurti: Kushtëzimi i Serbisë është shëndrruar në qëndrim të Lajçakut
