Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell ka shkruar për takimin e së shtunës që do të mbahet në Ohër, ndërmjet kryeministri të Kosovës, Albin Kurti dhe presidentit serb, Aleksandar Vuçiq.
Ai ka thënë se është koha që Kosova dhe Serbia të bien dakord për aneksin e zbatimit të Planit Evropian.
Në një shkrim të botuar në blogun e tij ai ka thënë se normalizimi i marrëdhënieve ndërmjet Kosovës dhe Serbisë është kusht për hapjen e rrugës drejt anëtarësimit në BE.
“Megjithatë, për të hapur rrugën drejt arritjes së objektivit të anëtarësimit në BE, Serbia dhe Kosova duhet të normalizojnë marrëdhëniet. Nuk ka rrugëdalje. BE-ja ka bërë pjesën e saj dhe dialogu Beograd-Prishtinë është një pjesë qendrore e mandatit tim”, ka shkruar ai, përcjell teve1.info.
Borrell ka thënë se negociatat kanë qenë të vështira, duke thënë se edhe çështjet e konsideruara teknike janë dëshmuar të ndjeshme dhe me potencial për tu kthyer në dhunë.
Kryeministri i Kosovës, Albin Kurti ka thënë se është i gatshëm ta nënshkruaj dhe ka qenë edhe më 27 shkurt në Bruksel, por që sipas tij, Serbia nuk ishte e gatshme për një gjë të tillë./teve1.info./
