Bordi i Drejtorëve i KRM Pastrimi Sh.A. ka reaguar sot pasdite, duke shpreh shqetësimin e saj siç thuhet të thellë dhe indinjatën ndaj veprimeve të Komunës së Prishtinës, “të cilat po e dëmtojnë rëndë gjendjen financiare të ndërmarrjes sonë publike”.
Në reagim thuhet se nga muaji janar e deri në faturën e muajit 30 prill 2025, borxhi i papaguar ndaj KRM Pastrimi ka arritur vlerën alarmante prej 2.2 milionë euro për shkak thirrjes publike të Komunës së Prishtinës drejtuar qytetarëve.
“Pavarësisht kryerjes së rregullt dhe të pandërprerë të shërbimeve të pastrimit dhe menaxhimit të mbeturinave, Komuna është duke dëmtuar kompaninë për faktin se nuk ka paguar asnjë centë që nga 01 janari 2025, duke krijuar rëndim të punës operative dhe vështërësi financiare për ndërmarrjen”, thuhet në komunikatë.
Bordi i Drejtorëve i KRM Pastrimi Sh.A tha se kjo situatë ka sjellë edhe vështirësi serioze në mbulimin e pagave për punëtorët, shpenzimeve për deponimin e mbeturinave, si dhe në furnizimin me derivate të cilat janë të domosdoshme për funksionimin e flotës të cilët janë shtyllat kryesore të operimit ditor të ndërmarrjes.
“Si rrjedhojë e gjithë kësaj situate nga 01 maj 2025 rrezikohet të mbyllen dyert e Deponisë për deponimin e mbetuirinave për të cilin pa vullnetin e KRM “Pastrimi” nuk do të ketë mundësi për të ofruar shërbim për qytetarët”, thuhet në reagim.
Sipas njoftimit: Për më tepër, thirrjet publike nga komuna drejtuar qytetarëve për mos-pagesë të faturave të mbeturinave tek KRM “Pastrimi”, e gjithashtu të nxitura dhe nga mungesa e përkrahjes institucionale të Komunës, po përkeqësojnë më tej gjendjen financiare dhe mund të çojnë në ndërprerjen e shërbimeve esenciale në Kryeqytet, duke rrezikuar seriozisht shëndetin publik dhe mjedisin si pasojë e mos grumbullimit të mbeturinave. Madje thirrjet për mos pagesë janë në kundërshtim me Rregulloren për ndryshimin dhe plotesimin e rregullores për Menaxhimin e Mbeturinave Nr.01-030/01-227581/23 i dates 01.12.2023 i marrë nga Kuvendi i Kryeqytetit, në mbledhjen e mbajtur me 05.12.2024 (protokolluar me nr.01-030/01-161704/24 date 06.12.2024
Po ashtu thuhet se “Nëse kjo situatë vazhdon, Bordi i Drejtorëve paralajmëron se do të jemi të detyruar të dërgojmë lëndët e borxheve të papaguara për ekzekutim tek përmbaruesi privat, si dhe do të autorizojmë menaxhmentin të ndërmarrë të gjitha veprimet e nevojshme ligjore, përfshirë edhe paraqitjen e kallëzimeve penale, në rast të keqpërdorimit të pozitës zyrtare dhe cenimit të funksionimit të një shërbimi publik jetik”.
Në fund të reagimit thuhet se KRM Pastrimi Sh.A. mbetet e përkushtuar për ofrimin e shërbimeve profesionale dhe të rregullta për qytetarët e Prishtinës, por kjo nuk mund të arrihet në mungesë të respektimit të obligimeve financiare nga ana e institucioneve komunale që dalin nga Rregulloret në fuqi.
